ដំរី​ ព្រៃ១១​ក្បាល​នៅ​មណ្ឌលគិរី ​ធ្លាក់​រណ្តៅ​អស់​ ៤​ថ្ងៃ​ត្រូវ​សង្គ្រោះ​

ជាង សុខា No Comments Share:

ភ្នំពេញ៖(ខ្មែរថាមស៍)មន្ត្រី​បរិស្ថាន​បាន​និយាយ​ថា​សត្វ​ដំរី​ព្រៃ​ចំនួន ​១១​ក្បាលត្រូវ​បាន​សង្គ្រោះ​ចេញ​ពី​រណ្តៅ​ភក់​កាល​ពី​ល្ងាច​ថ្ងៃ​សៅរ៍​ នៅ​ខេត្ត​មណ្ឌលគិរី ​បន្ទាប់​ពី​បាន​ធ្លាក់​ចូល​អស់​រយៈពេល ​៤​ថ្ងៃ​កន្លង​មក។​

​លោក កែវ សុភ័ក្រ ប្រធាន​មន្ទីរ​បរិស្ថាន​ ខេត្ត​មណ្ឌលគិរី ​បាន​និយាយ​ប្រាប់​កាសែត​ខ្មែរ​ថាមស៍ កាល​ពី​ថ្ងៃអាទិត្យ​ ថា​ សត្វ​ដំរី​ទាំង​ ១១​ក្បាល​នោះ​រួម​ទាំង​កូន​ដំរី​ ១​ផង​បាន​ធ្លាក់​ចូល​រណ្តៅ​គ្រាប់​បេ​ ដែល​សល់​ពី​​​ការ​ទម្រាក់​គ្រាប់​របស់​​អាមេរិក កាល​ពី​ជំនាន់​សង្គ្រាម​ជាមួយ​វៀតណាម ​ដែល​មាន​ជម្រៅ​ប្រហែល ​៣​ម៉ែត្រ ​ស្ថិត​នៅ​ក្នុង​ភូមិ​អូរអាម ឃុំ​ស្រែខ្ទម ស្រុក​កែវសីមា ខេត្ត​មណ្ឌលគិរី ​រយៈពេល​ ៤​ថ្ងៃ​មក ហើយ​ទើប​ប្រជាពលរដ្ឋ​ដែល​ស្វែង​រក​អនុផល​ព្រៃ​ឈើ​ប្រទះ​ឃើញ និង​បាន​រាយការណ៍​មក​អាជ្ញាធរ​ដើម្បី​ជួយ​សង្គ្រោះ។​

​លោក​បាន​ថ្លែង​ថា​ ក្រុម​ជួយ​សង្គ្រោះ​បាន​ចំណាយ​ពេល​ប្រហែល​ជា​ ៥​ម៉ោង​ដើម្បី​ជួយ​សត្វ​ដំរី​ទាំង​នោះ​ចេញ​ពី​រណ្តៅ​ភក់​ដែល​ស្ងួត​ក្រាំង​ទៅ​ហើយ។ ក្រុម​ជួយ​សង្គ្រោះ​ដែល​មាន​ការ​ចូលរួម​ពី​កម្លាំង​សមត្ថកិច្ចនិង​ប្រជាពលរដ្ឋ​ក្នុង​សហគម៍​ផង​នោះ​បាន​ជីក​មាត់​រណ្តៅ​ឲ្យ​មាន​ជម្រាល​ ហើយ​ដាក់​មែក​ឈើ​ដើម្បី​ឲ្យ​ដំរី​ងាយ​ស្រួល​ឡើង ខណៈ​ដែល​អ្នក​ខ្លះ​បាន​បាញ់​​ទឹក លាង​ភក់​ឲ្យ​ដំរី​ និង​បាន​បោះ​ស្លឹក​ឫស្សី​ឲ្យ​ស៊ី​ដើម្បី​មាន​កម្លាំង​ផង​ដែរ។​

. .

​លោក​បាន​ថ្លែង​ថា៖ «សត្វ​ដំរី​ទាំង​នេះ​អាច​ងាប់​ប្រសិន​បើ​យើង​សង្គ្រោះ​មិន​បាន​ទាន់​ពេល​វេលា​ទេ​នោះ គឺ​ងាប់​ដោយសារ​ដាច់​ទឹក​ និង​អត់​ចំណី​តែ​ម្តង។ កូន​ដំរី​ដែល​អាច​ឡើង​រួច​ក្រោយ​គេ គឺ​ដោយសារ​ប្រើ​ខ្សែ​ទាក់​ ហើយ​ទាញ​ឡើង​មក»។

​បើ​តាម​លោកសុភ័ក្រកាល​ដែល​ដំរី​ទាំង​អស់​ធ្លាក់​ចូល​ក្នុង​រណ្តៅ​អាច​មក​ពី​កូន​ដំរី​ដែល​តូច​ជាង​គេ​ធ្លាក់​ ហើយ​សត្វ​ដំរី​ដ៏ទៃ​ទៀត​ចុះ​មក​ជួយ​តែ​ជួយ​មិន​បាន​ដោយសារ​ឡើង​មក​វិញ​មិន​រួច​ក៏​ជាប់​ទាំង​អស់​គ្នា​តែ​ម្តង​ទៅ។ លោក​ថ្លែង​បន្ត​ទៀត​ថា មិន​មែន​ដំរី​ទាំង​នោះ​មក​ផឹក​ទឹក​នេះ​ទេ ពីព្រោះ​នៅ​ជិត​រណ្តៅ​ដែល​ធ្លាក់​ប្រហែល​ ១០០​ម៉ែត្រ​មាន​អូរ​មួយ​ដែល​ដំរី​ងាយ​ស្រួល​ផឹក​ទៀត​ផង។​

​លោកស្រី Botumroat Lebun មន្ត្រី​នៃ​អង្គការ​ការពារ​សត្វព្រៃ Wildlife Alliance បាន​និយាយ​ថា សត្វ​ដំរី​ដែល​ធ្លាក់​ក្នុង​រណ្តៅ​ទាំង​នោះ​មក​រក​ទឹក​ផឹក​ដោយសារ​អាកាសធាតុ​ក្តៅ​ព្រោះ​គេ​កាប់​ឆ្កា​ព្រៃ​អស់​យក​ដី​សម្រាប់​ដាំ​ដំឡូងមី។លោកស្រី​បាន​បន្ថែម​ថា​សត្វ​ដំរី​ទាំង​នោះ​អាច​នឹង​ងាប់ ដោយ​ការ​អត់​ទឹក​ និង​អត់​ចំណីរ​តែ​ត្រូវ​បាន​ជួយ​ទាន់​ពេល​វេលា។​

​រដ្ឋមន្ត្រី​ក្រសួង​បរិស្ថាន ​លោក សាយ សំអាល់ បាន​និយាយ​ថា ការ​ជួយ​សង្គ្រោះ​សត្វ​ដំរី​ព្រៃ​ចំនួន ១១​ក្បាល (រួម​ទាំង​កូន​ដំរី​ផង​ដែរ) ដែល​ធ្លាក់​ក្នុង​រណ្តៅ​គ្រាប់បែក​សម័យ​សង្គ្រាម ស្ថិត​នៅ​ក្នុង​ភូមិ​អូរអាម ឃុំ​ស្រែខ្ទម ស្រុក​កែវសីមា ខេត្ត​មណ្ឌលគិរី ទទួល​បាន​ជោគជ័យ នា​រសៀល​ថ្ងៃ​ទី​២៥ ខែ​មីនា ឆ្នាំ​២០១៧ ម្សិលមិញ​នេះ។ដោយ​ហេតុ​ថា មាន​ការ​ខ្វះខាត​មធ្យោបាយ និង​ដោយសារ​ទីតាំង​នោះ​ស្ថិត​នៅ​ដាច់​ស្រយាល​ពុំ​មាន​ផ្លូវ​រថយន្ត​ចេញ​ចូល ក្រុម​ការងារ​បាន​ប្រើប្រាស់​គ្រប់​លទ្ធភាព​ និង​វិធីសាស្ត្រ​ដែល​ខ្លួន​មាន និង​បាន​ចំណាយ​ពេល​អស់​ជាង ៥​ម៉ោង​ដើម្បី​ជួយ​សង្គ្រោះ​សត្វ​ដំរី​ទាំង​នោះ។​

​លោក​ថា៖ «កិច្ច​ប្រតិបត្តិការ​ជួយ​សង្គ្រោះ​សត្វ​ដំរី​នេះ​គឺ​ជា​កាយវិការ​ដ៏​ប្រពៃ​ដែល​ឆ្លុះ​បញ្ចាំងយ៉ាង​ច្បាស់​នូវ​ទឹក​ចិត្ត​ស្រលាញ់​សត្វ​ព្រៃ​របស់​មន្ត្រី​មាន​សមត្ថកិច្ច អ្នក​បចេ្ចកទេស​ជាតិ​ និង​អន្តរជាតិ និង​ប្រជា​សហគមន៍​មូលដ្ឋាន»។

. .

«ជាមួយ​នឹង​ស្មារតី​នេះខ្ញុំ​សូម​អំពាវនាវ​ដល់​អ្នក​ពាក់ព័ន្ធ​ទាំង​អស់ឲ្យ​បន្ត​ចូលរួម​​កាន់​តែ​សកម្ម​បន្ថែម​ទៀត​ក្នុង​យុទ្ធនាការ​ការពារ និង​អភិរក្ស​ធនធាន​ធម្មជាតិ ជាពិសេស​ព្រៃ​ឈើ និង​សត្វ​ព្រៃ ដែល​ជា​បេតិកភ័ណ្ឌ​ធម្មជាតិ​ដ៏​មាន​តម្លៃ​បន្សល់​ទុក​ដោយ​ដូនតា​​របស់​យើង ដើម្បី​ជា​ប្រយោជន៍​ដល់​សង្គម​ជាតិ​យើង​នា​ពេល​បច្ចុប្បន្ន ក៏​ដូច​ជា​អនាគត»។

​បើ​តាម​ការ​ឲ្យ​ដឹង​ពី​លោក សុភ័ក្រ ដំរី​ព្រៃ​ដែល​ជិត​ផុត​ពូជ​ទាំង​នេះ​នៅ​មាន​ប្រហែល​ពី​២០០​ទៅ​២៥០​ក្បាល​ប៉ុណ្ណោះ​នៅ​ខេត្ត​មណ្ឌលគិរី។
កាល​ពី​ថ្ងៃ​ទី​២២ ខែ​មីនា កន្លង​មក​នេះ ដំរី​ដ៏​ធំ​មួយ​ក្បាល​ត្រូវ​បាន​ប្រជាពលរដ្ឋ​មូលដ្ឋាន​ប្រទះ​ឃើញ​ដេក​ងាប់ ស្ថិត​នៅ​តាម​ជើង​ភ្នំ​តំបន់​គិរីរម្យ​ជាប់ ក្នុង​ទឹក​ដី​ស្រុក​កំពង់សីលា​ ខេត្ត​ព្រះសីហនុ ព្រំ​ប្រទល់​ស្រុក​ភ្នំស្រួច ខេត្តកំពង់ស្ពឺ ដែល​ក្រុម​មន្ត្រី​អះអាង​ថា ដំរី​នោះ​ងាប់​ដោយសារតែ​ត្រូវ​ឆក់​ខ្សែ​តង់ស្យុង​អគ្គិសនី។

​ចំណែក​កាល​ពី​ខែ​កក្កដា ឆ្នាំ​២០១៦ មន្ត្រី​បរិស្ថាន​ដែន​ជម្រក​សត្វ​ព្រៃ​កែវសីមា ខេត្ត​មណ្ឌលគិរី ក៏​ធ្លាប់​បាន​ជួយ​សង្គ្រោះ​កូន​ដំរី មួយ​ក្បាល​ក្នុង​ពេល​ដែល​ចុះ​ទៅ​ដើរ​ត្រួត​ពិនិត្យ​ព្រៃ និង​បទ​ល្មើស​ផ្សេងៗ​ក្នុង​ដែន​ជម្រក​សត្វ​ព្រៃ​កែវស៊ីមា ខេត្ត​មណ្ឌលគិរី។ ប៉ុន្តែ​កូន​ដំរី​នោះ បាន​ងាប់ ក្រោយ​ពេល​ដែល​ក្រុម​ការងារ​បរិស្ថាន បាន​ព្យាយាម​ជួយ​ជួយ​សង្គ្រោះ ដោយសារ​កូន​ដំរី​នោះ ជាប់​អន្ទាក់​ព្រាន​ព្រៃ មាន​រយៈពេល​យូរ ហើយ​កូនដំរី ដាច់​ចំណី ដាច់​ទឹក មាន​ដំបៅ ពេញ​ខ្លួន និង​ជើង៕​  

. .
Share and Like this post

Related Posts

Previous Article

កែវ រ៉េមី​៖ រដ្ឋាភិបាល​មាន​គុណ​សម្បត្តិ​ស្មើ​មេឃ​ក្នុង​ការ​ការពារ​សិទ្ធិ

Next Article

ផែ​ព្រះសីហនុ​នឹង​ចាប់ផ្តើម​​ស្ទង់​តម្លៃ​ភាគហ៊ុន ខ្លួន​ខែក្រោយ​