រដ្ឋាភិបាល៖ ​កម្លាំង​ប្រដាប់អាវុធ កុំ​ច្រណែន​នឹង​ប្រាក់ខែ​គ្រូបង្រៀន​

ប៉ិច សុធារី No Comments Share:

ភ្នំពេញ៖ (ខ្មែរថាមស៍)ប្រមុខ​រាជរដ្ឋាភិបាលកាល​ពី​ថ្ងៃ​ម្សិលមិញ បាន​អំពាវនាវ​ដល់​កងកម្លាំង​ប្រដាប់អាវុធ និង​មន្ត្រី​រាជការ​ស៊ីវិល​ផ្នែក​ផ្សេងៗកុំ​ច្រណែន​នឹង​គ្រូបង្រៀននិង​គ្រូពេទ្យ​ដែល​ទទួល​បាន​ប្រាក់​បៀវត្សរ៍​ខ្ពស់​ជាងខណៈ​ដែល​គ្រូបង្រៀន​ជា​ថ្នាល​បណ្តុះបណ្តាល​ដល់​ធនធាន​មនុស្ស។​

​ក្នុង​ពិធី​ប្រគល់​សញ្ញាបត្រ​ដល់​គរុនិស្សិត-​សិស្ស នៅ​វិទ្យាស្ថាន​ជាតិ​អប់រំ លោក​នាយក​រដ្ឋមន្ត្រី ហ៊ុន សែនបាន​ថ្លែង​ថាយោង​តាម​កម្រិត​ប្រាក់​បៀវត្សរ៍​សម្រាប់​មន្ត្រី​រាជការ និង​កងកម្លាំង​ប្រដាប់អាវុធ ស្រប​ពេល​ដែល​រាជរដ្ឋាភិបាល នឹង​ដំឡើង​ជា​លើក​ទី​២ ក្នុង​ឆ្នាំ​២០១៧​ នេះ ឃើញ​ថា ប្រាក់​បៀវត្សរ៍​គ្រូបង្រៀន និង​គ្រូពេទ្យ មាន​កម្រិត​ខ្ពស់​ជាង​ប្រាក់​បៀវត្សរ៍​កងកម្លាំង​ប្រដាប់អាវុធ ដែល​ករណី​នេះ លោក​អំពាវនាវ​កុំ​ឲ្យ​មាន​ការ​ច្រណែន ព្រោះតែ​គ្រូបង្រៀន​ គឺ​ជា​អ្នក​បណ្តុះបណ្តាល​ធនធាន​មនុស្ស។

​លោក​ថា៖ «ខ្ញុំ​សូម​យក​ឱកាស​នេះ​អំពាវនាវ​ឲ្យ​ខាង​[កងកម្លាំង]​ប្រដាប់អាវុធ ឬ​ក៏​ផ្នែក​ដទៃ​ទៀត កុំ​ច្រណែន​ជាមួយ​គ្រូបង្រៀន ព្រោះ​គ្រូបង្រៀន​ និង​គ្រូពេទ្យ​ប្រាក់ខែ​ខ្ពស់​ជាង​គេ ក៏​ប៉ុន្តែ​ខ្ញុំ​គិត​ថា កងកម្លាំង​ប្រដាប់អាវុធ ជា​កងទ័ព​ក្តី ជា​នគរបាល​ក្តី និង​មន្ត្រី​រាជការ​ក្តី មិន​ច្រណែន​ជាមួយ​គ្រូបង្រៀន​ និង​គ្រូពេទ្យ​ទេ ដោយសារ​តែ​កូន​របស់​គាត់ ចៅ​របស់​គាត់ ក៏​ត្រូវ​ការ​គ្រូបង្រៀន​កូន​ និង​ចៅ​របស់​គាត់ ក៏​ត្រូវការ​គ្រូពេទ្យ​ដែរ»។​

. .

​បើ​តាម​លោក​នាយក​រដ្ឋមន្ត្រី ហ៊ុន សែន ប្រាក់​បៀវត្សរ៍​ទាប​បំផុត​សម្រាប់​មន្ត្រី​រាជការ​ស៊ីវិល កាល​ពី​ឆ្នាំ​២០១៦ ទទួល​បាន ៧០០,៥០០​រៀល នៅ​ដើម​ឆ្នាំ​២០១៧ ត្រូវ​បាន​ដំឡើង​ដល់ ៧៥៣,៥០០​រៀល ហើយ​នៅ​ដើម​ខែ​មេសា ​ខាង​មុខ​នេះ នឹង​ទទួល​បាន ៨៥៣,៥០០​រៀល ខណៈ​ប្រាក់​បៀវត្សរ៍​សម្រាប់​កម្លាំង​នគរបាល​ជាតិ ទទួល​បាន ៩៣៧,៩៧៧​រៀល ដោយ​រាប់​បញ្ចូល​របប​អង្ករ និង​ប្រាក់​បៀវត្សរ៍​កងទ័ព ទទួល​បាន​ ៨៨០.៩៧៧​រៀល ដោយ​មិន​គិត​របប​អង្ករ។ ដោយ​ឡែក សម្រាប់​គ្រូបង្រៀន និង​គ្រូពេទ្យ កាលពី​ឆ្នាំ​២០១៦ ទទួល​បាន ៨០០,៥០០​រៀល នៅ​ដើម​ឆ្នាំ​២០១៧ ទទួល​បាន ៨៥០,៣៥០​រៀល ហើយ​នៅ​ខែ​មេសា ​នឹង​ឡើង​ដល់ ៩៥៣,៥០០​រៀល ដោយ​មិន​ទាន់​គិត​ប្រាក់​តំបន់​ដែល​មាន​ចាប់​ពី ​៨​ម៉ឺន​រៀល ទៅ​១២​ម៉ឺន​រៀល​នៅ​ឡើយ។​

​ស្រប​ពេល​គ្នា​នេះ​ដែរ កាល​ពី​ថ្ងៃ​អង្គារ គណៈកម្មាធិការ​អចិន្ត្រៃយ៍​រដ្ឋសភា ក៏​បាន​ពិនិត្យ​ទៅ​លើ​របៀបវារៈ​នៃ​សម័យ​ប្រជុំ​លើក​ទី​៨ នីតិកាល​ទី​៥ នូវ​សេចក្តី​ស្នើច្បាប់​ស្ដីពី វិសោធនកម្ម​ច្បាប់​ស្ដីពី​លក្ខន្តិកៈ​មន្ត្រី​រាជការ​នៃ​ក្រុម​នីតិប្បញ្ញត្តិ។

​ការ​ស្នើ​ធ្វើ​វិសោធនកម្ម​ច្បាប់​នេះ​ឡើង​វិញត្រូវ​បាន​អ្នក​តំណាងរាស្ត្រ​គណបក្ស​ប្រជាជន​កម្ពុជា លោក ឈាង វុន បញ្ជាក់​ថា ធ្វើ​ឡើង​ក្នុង​គោល​បំណង​ពិនិត្យ​លទ្ធភាព​លើ​ការ​ដំឡើង​ប្រាក់​បៀវត្សរ៍​សម្រាប់​មន្ត្រី​រាជការ​នៃ​ក្រុម​នីតិប្បញ្ញត្តិ ឲ្យ​ដូច​ទៅ​នឹង​មន្ត្រី​រាជការ​ក្នុង​ជួរ​រាជ​រដ្ឋាភិបាល​ដែរ។

លោក​បន្ត​ថា៖«ខាង​អង្គការ​នីតិប្បញ្ញត្តិក៏​មាន​មន្ត្រី​រាជការ​របស់​រដ្ឋ​ដែរដោយសារ​យើង​ជា​អង្គការ​មួយមាន​អំណាច​ដាច់​ពី​អំណាច​អង្គការ​នីតិប្រតិបត្តិ អុីចឹង​ហើយ​យើង​ត្រូវ​មើល​ដែរ សភា​ ទាំង​ពីរ និង​ក្រុមប្រឹក្សាធម្មនុញ្ញ​ដែល​មាន​មន្ត្រី​រាជការ​របស់​ខ្លួន ត្រូវ​មើល​ឡើង​វិញ​ដែរ​ថា​តើ​មន្ត្រី​របស់​យើង​ត្រូវ​ធ្វើ​ឲ្យ​បាន​ដូច​គ្នា​ជាមួយ​នឹង​មន្ត្រី​រាជការ​ក្នុង​ផ្នែក​នីតិប្រតិបត្តិ​ដែរអុីចឹង​ត្រូវ​រុញ​បាន​ដូច​គ្នា ដើម្បី​ឲ្យ​គាត់​ទទួល​បាន​ផល​ពី​គោល​នយោបាយ​របស់​សម្តេច​នាយក​រដ្ឋមន្ត្រី»។

​ប្រធាន​សមាគម​មន្ត្រី​រាជការ​ឯករាជ្យ​កម្ពុជា លោក​ហៀកព្រីងបាន​លើក​ឡើង​ថា នេះ​ជា​រឿង​ល្អ​ដែល​រាជរដ្ឋាភិបាល​បាន​គិតគូរ​ដំឡើង​ប្រាក់​បៀវត្សរ៍​ជូន​មន្ត្រី​រាជការ និង​កងកម្លាំង​ប្រដាប់អាវុធស្រប​ពេល​គ្នា បើ​ទោះ​ជា​ប្រាក់​បៀវត្សរ៍​មាន​គម្លាត​ពី​គ្នា​ខ្លះ​ក៏​ដោយ។

. .

តែ​យ៉ាង​ណា លោក​ថា៖ «ក្នុង​នាម​រាជរដ្ឋាភិបាល គួរ​ជួយ​យក​ចិត្ត​ទុក​ដាក់​ឲ្យ​ការ​ដំឡើង​ប្រាក់​ខែ​មន្ត្រី​រាជការ​ឲ្យ​ប្រហាក់ប្រហែល​គ្នា កុំ​ឲ្យ​មាន​គម្លាត​ពី​គ្នា ព្រោះ​ក្នុង​នាម​ជា​មន្ត្រី​រាជការ​ដូច​គ្នា ហើយ​ការ​បំពេញ​ការងារ​ដូច​គ្នា ផ្តល់​សេវា​សាធារណៈ​ដូច​គ្នា អុីចឹង​បើ​គាត់​មាន​លទ្ធភាព​ជួយ​រុញ​ឲ្យ​ប្រាក់​បៀវត្សរ៍​បាន​ប្រហាក់ប្រហែល​គ្នា​ គឺ​ជា​ការ​ល្អ ប៉ុន្តែ​បើ​គាត់​សំណូមពរ​អុីចឹង​ហើយធ្វើ​ម៉េច​នេះ​ជា​អាទិភាព​របស់​រាជរដ្ឋាភិបាល តែ​អ្វី​ក៏​ដោយ​បើ​សិន​ជា​គាត់​បាន​គិតគូរ​កូនចៅ​ស្មើៗ​គ្នា​នោះ​ជា​ការ​ល្អ»។​

​ក្រៅ​ពី​ការ​ដំឡើង​ប្រាក់​បៀវត្សរ៍​មន្ត្រី​រាជការនិង​កង​កម្លាំង​ប្រដាប់អាវុធ​នៅ​ដើម​ខែ​មេសា​ខាង​មុខ​នេះរាជរដ្ឋាភិបាលធ្លាប់​បាន​ប្រកាស​កាល​ពី​ចុង​ខែ​កុម្ភៈ ពី​ការ​ទម្លាក់​ថវិកា​ជាតិ​ប្រមាណ ៣០​ពាន់​លាន​រៀលស្មើ​ប្រមាណ៧​លាន​ដុល្លារ​អាមេរិក សម្រាប់​ឧបត្ថម្ភ​ដល់​មន្ត្រី​រាជការ និង​កងកម្លាំង​ប្រដាប់អាវុធ ក្នុង​ម្នាក់ៗ ៥​ម៉ឺន​រៀល ក្នុង​ឱកាស​បុណ្យ​ចូលឆ្នាំ​ប្រពៃណី​ជាតិ​ខ្មែរ ​ផង​ដែរ៕  

. .
Share and Like this post

Related Posts

Previous Article

ពិធីបុណ្យ​ទន្លេ​សម្ពោធ​ជា​ផ្លូវការ​ព្រឹក​នេះ​ក្នុង​ខេត្ត​ស្ទឹងត្រែង​

Next Article

រដ្ឋាភិបាល​​នឹង​​ពិចារណា​សម្រេច​អនាគត​របស់​អគារ Gold Tower 42