អ្នក​គាំទ្រ​សិទ្ធ​ស្ត្រី​ជជែក​ដេញ​ដោល​ពី​ប្រធាន​បទ ​«ភាព​ស្អាតស្អំ​» របស់​ស្រ្ដី

ប៉ា សុខេង / Khmer Times No Comments Share:
វាគ្មិន​ទាំង ៥រូប​ដែល​មកពី​ស្ថាប័ន​ខុសៗ​គ្នា បានមក​ជួប​ពិភាក្សា​គ្នា​លើ​ប្រធាន​បទ​ ភាពស្អាតស្អំ របស់​ស្ត្រីនៅ មជ្ឈមណ្ឌល​ Meta House។

​វាគ្មិន​ពី​ស្រទាប់​វ័យ​ផ្សេងគ្នា​មាន​ដូចជា​ ​បុគ្គលិក​បុរស​ក្នុង​អង្គការ​ដែល​ធ្វើការ​ទាក់ទង​នឹង​ស្ត្រី​ ​សមាជិក​ក្រុម​អ្នក​ស្រឡាញ់​ភេទ​ដូចគ្នា​ ​ស្ត្រី​កំពុង​បំពេញមុខ​ងារ​ជា​អ្នកសារព័ត៌មាន​ ​និង​ស្ត្រី​ដែល​ធ្លាប់​បំពេញមុខ​ងារ​ជា​តំណាង​រាស្ដ្រ​ ​បាន​ប្រជុំ​គ្នា​ក្នុង​កិច្ចពិភាក្សា​តស៊ូ​មតិ​មួយ​ដែល​មានឈ្មោះ​ថា​ ​Reconstructing​ ​Roles​ ​of​ ​Women​ ​in​ ​Cambodia​ ​កាលពី​ចុងខែ​តុលា​កន្លងទៅ​ ​ដើម្បី​ ​ជជែក​ដេញដោល​ពី​បញ្ហា​ប្រឈម​របស់​ស្ដ្រី​លើ​មុខរបរ​ ​ស្នេហា​ ​ទស្សនៈ​ ​ព្រមទាំង​ដំណោះស្រាយ​ដែល​ប្រសើរ​ជាង​មុន​។​

​ការពិភាក្សា​អំពី​ការ​វិវត្ត​នៃ​តួនាទី​របស់​ស្ដ្រី​នៅ​កម្ពុជា​ ​ហាក់​កំពុង​ទទួល​បានការ​ចាប់អារម្មណ៍​នា​ពេល​បច្ចុប្បន្ន​មិនថា​ចំពោះ​ស្ត្រី​ខ្មែរ​ខ្លួនឯង​ ​និង​សូម្បី​ជនបរទេស​ដែល​កំពុង​ស្នាក់នៅ​ក្នុង​ប្រទេស​នេះ​។​ ​ចំណាប់​អារម្មណ៍​ទាំងនោះ​ ​អាច​បង្ហាញ​ពី​ការ​ចង់​ដឹង​ចង់​លឺ​ ​ពី​កង្វល់​ដែល​ស្ត្រី​ខ្មែរ​តែង​ជួបប្រទះ​កន្លងមក​ ​និង​ភាព​ប្រសើរ​ឡើង​ដោយ​វិជ្ជមាន​ផង​ដែរ​។​

​មិនថា​តាមរយៈ​ការអប់រំ​កូនស្រី​ដោយ​ប្រើ​ច្បាប់ស្រី​ ​ឬ​របៀប​តៗ​គ្នា​ក្ដី​ ​«​ភាព​ស្អាតស្អំ​»​ ​ជា​ឃ្លា​មួយ​ដែល​ចាស់ទុំ​តែង​យក​ប្រើជា​ច្រើន​សម័យកាល​មក​ហើយ​ ​ខណៈ​មកដល់​សតវត្ស​ទី២១នេះ​ ​ការកំណត់​និយមន័យ​នៃ​ភាព​ស្អាតស្អំ​គឺ​ផ្សេង​ៗ​គ្នា​។​

​ពន្យល់​ប្រាប់​ទស្សនិកជន​ទាំង​ជាតិ​ ​និង​អន្តរជាតិ​មិន​តិច​ជាង ៥០នាក់​នៅ​ ​Metahouse​ ​និស្សិត​ឆ្នាំទី៣ផ្នែក​សារព័ត៌មាន​ ​កញ្ញា​ប៉ា​ ​សុ​ខេ​ង​បាន​បកស្រាយ​ពី​ផ្នត់គំនិត​ចាស់​ទុំ​ខ្លះ​ៗ​ដែល​ជឿ​ថា​ ​ចាស់ទុំ​ធ្វើឡើង​ដើម្បី​ភាព​ស្អាតស្អំ​សម្រាប់​ស្ដ្រី​ពី​មួយ​ជំនាន់​ទៅ​មួយ​ជំនាន់​។​ ​ឆ្លើយតប​នឹង​សំណួរ​ពី​ទស្សិ​ក​ជន​ ​ដែល​សួរ​ថា​ ​តើ​នៅ​ជនបទ​ ​ក៏ដូចជា​ទីក្រុង​ ​ចំពោះ​ស្ដ្រី​ ​ត្រូវ​បាន​គេ​កំណត់​ថា​មាន​ភាព​ស្អាតស្អំ​ដោយ​របៀបណា​?​

​ជា​កូនស្រី​មក​ពី​ជនបទ​ ​សុ​ខេ​ង​បានឱ្យ​និយមន័យ​ភាព​ស្អាតស្អំ​សំដៅ​ដល់​ការ​ស្ដាប់បង្គាប់​ឪពុកម្ដាយ​ ​មិន​ប្រព្រឹត្ត​ខ្លួន​ឱ្យ​ខុស​ប្រពៃណី​មុន​ពេល​រៀបការ​(​មិន​រួមភេទ​មុន​រៀបការ​)​។​

​អ្នកសារព័ត៌មាន​រូប​នេះ​ប្រាប់​ថា​៖​«​ខ្ញុំ​ធំឡើង​នៅ​ឯ​ខេត្ត​ ​ជា​ធម្មតា​អ្នកម្ដាយ​ ​និង​បងស្រី​តែង​ណែនាំ​ឱ្យ​រៀបចំ​ឥរិយាបថ​ឱ្យ​ហ្នឹង​ធឹង​ ​មាន​របៀប​ពោល​គឺ​មិន​ឱ្យ​ប្រព្រឹត្ត​ខ្លួន​ផ្តេសផ្តាស​មុន​រៀបការ​ឡើយ​។​ ​ចាស់ទុំ​លោក​យល់ថា​ ​ការ​រួមភេទ​មុន​រៀបការ​ជា​រឿង​មិន​ត្រឹមត្រូវ​ ​ព្រោះ​លោក​បារម្ភ​ដោយសារ​វា​ខុស​នឹង​ប្រពៃណី​។​ ​ខ្លាច​កូនប្រុស​មិន​ទទួលខុសត្រូវ​ ​ណាមួយ​លោក​បារម្ភ​ព្រោះ​ខ្មាស​ញាតិ​ ​គេ​និយាយដើម​ជាពិសេស​កូនស្រី​នឹង​មិន​មានតម្លៃ​ឱ្យ​គេ​ចង់បាន​ជា​គូរ​អនាគត​។​ ​អ៊ឹ​ចឹង​ហើយ​ ​ការ​ស្ដាប់បង្គាប់​ឪពុកម្ដាយ​ ​មាន​សីលធម៌​ ​មាន​ទំនួល​ខុសត្រូវ​ ​និង​ប្រកាន់​នូវ​ភាព​ថ្លៃថ្នូរ​ ​ជា​អ្វី​ដែល​លោក​ហៅថា​ស្អាតស្អំ​។​ ​»​

​យ៉ាងណា​មកដល់​សម័យនេះ​ ​យុវ​ត្តី​វ័យ ២១ឆ្នាំ​ខាងលើ​ ​បាន​បង្ហាញ​នូវ​ទស្សនៈ​ថា​ ​មានការ​ប្រែប្រួល​គួរ​ឱ្យ​កត់សម្គាល់​ដែរ​៖​ ​«​ប៉ុន្តែ​មកដល់​សម័យ​ឥឡូវ​ ​ខ្ញុំ​ថា​ភាព​ស្អាតស្អំ​គឺ​បាន​និយមន័យ​ពី​ខ្លួន​យើង​ម្នា​ក់ៗ​។​ ​ឥឡូវ​មិន​អ៊ឹ​ចឹង​ទេ​ ​ម្នា​ក់ៗ​មាន​ផ្នត់​គំ​និ​ត​រៀង​ៗ​ខ្លួន​ ​ឪពុកម្ដាយ​ផ្តល់​ឱកាស​ឱ្យ​កូនស​ម្រេច​ចិត្ត​ ​ហើយ​កូន​វិញ​ជ្រើស​នូវ​ជម្រើស​ដែល​ខ្លួន​គិតថា​សក្តិ​សមជា​ជាង​ជឿ​លើ​ការ​និយាយ​បែបនេះ​បែប​នោះ​ពី​អ្នក​ជុំវិញ​ខ្លួន​។​ ​តែ​ទោះបីជា​មានការ​ផ្តល់​ឱកាស​ទាំងស្រុង​យ៉ាងណាក្ដី​ ​ខ្ញុំ​ថា​ការព្រមព្រៀង​មុន​ ​រឺ​ក្រោយ​រៀបការ​ ​វា​អាស្រ័យ​លើ​បុគ្គល​ខ្លួនឯង​ ​មានការ​ទទួលខុសត្រូវ​ ​និង​មាន​ភាព​ចាស់ទុំ​ខ្លាំង​ប៉ុណ្ណា​។​ ​ការ​មិនបាន​ពិចារណា​ឱ្យ​បាន​ល្អិតល្អន់​មុននឹង​ប្រព្រឹត្ត​ ​វា​នឹង​ធ្វើ​ឱ្យ​មាន​វិប្បដិសារី​ទៅ​ថ្ងៃក្រោយ​ ​ព្រោះ​នៅ​ទៅ​បំផុត​ទៅ​ ​យើង​ជា​អ្នកទទួល​ខុសត្រូវ​លើ​ជីវិត​យើង​»​

​ចំណែក​ឯ​ស្ដ្រី​វ័យ ៣២ឆ្នាំ​ ​កញ្ញា​ឈឿង​ ​រចនា​(​អ្នក​ស្រឡាញ់​ភេទ​ដូចគ្នា​)​បាន​បញ្ជាក់​ពី​ទស្សនៈ​របស់​ខ្លួន​ថា​៖​ ​«​មកដល់​សម័យនេះ​ហើយ​ ​ស្ដ្រី​ដែល​ដើរហើរ​ពេលយប់​ពុំមែន​មានន័យថា​ ​មិន​មាន​ភាព​ស្អាតស្អំ​នោះ​ឡើយ​។​ ​បុរស​អាច​ដើរលេង​យប់​បាន​ ​ស្ដ្រី​ក៏អាច​ដើរ​បាន​។​ ​ប៉ុន្តែ​ទាស់​ត្រង់ថា​ ​ស្ដ្រី​ខ្លួនឯង​ត្រូវ​ចេះ​ការពារ​ខ្លួន​ ​និង​ប្រយ័ត្ន​ប្រយែង​ដោយ​របៀបណា​?​ ​បើ​អ្នក​មិនដែល​មាន​បទ​ពិសោធ​ទេ​ ​គួរ​កុំទៅ​ណា​ម្នាក់ឯង​ពេលយប់​។​ ​ហើយ​បើ​មិន​មាន​មនុស្ស​ដែល​ទុកចិត្ត​បាន​ដើរ​ជាមួយ​ ​ក៏​មិន​ត្រូវ​ទៅ​ ​ព្រោះ​មិន​មាន​សុវត្ថិភាព​ឡើយ​។​ ​ការសេពគប់​មិត្ត​ក៏​ដូចគ្នា​ ​ត្រូវ​ប្រយ័ត្ន​ឱ្យ​មែនទែន​ ​ព្រោះ​មនុស្ស​សម័យនេះ​ ​ទុកចិត្ត​មិនបាន​ទាំងអស់​នោះ​ទេ​។​ ​ចឹង​ចំពោះ​ខ្ញុំ​ ​ភាព​ស្អាតស្អំ​គឺ​សំដៅ​ដល់​មាន​ភាពជា​ខ្លួនឯង​។​»​

​រចនា​បាន​បន្ថែម​ថា​៖​ ​«​ដើម្បី​អភិវឌ្ឍ​សមត្ថភាព​ ​និង​លក្ខណៈ​ពិសេស​របស់​ខ្លួន​ ​ស្ត្រី​ត្រូវ​ហ៊ាន​និយាយ​នូវ​ទស្សនៈ​ចេញ​មក​ក្រៅ​ជាជាង​លាក់​ទុក​តែ​ក្នុង​ខ្លួន​។​ ​រឿង​ឃាត់​មិន​ឱ្យ​កូនស្រី​ចេញក្រៅ​ផ្ទះ​យប់​ ​វា​មិន​មែន​ត្រូ​ច​គ្រប់​កាលៈទេសៈ​នោះ​ទេ​។​ ​សម័យនេះ​ហើយ​ ​គេ​ត្រូវការ​រៀនសូត្រ​ ​ធ្វើការ​ងារ​ផ្សេង​ៗ​។​ ​បើ​សូម្បី​ស្ដ្រី​គ្នាឯង​ ​ក៏​ការពារ​ថា​ការ​ឃាត់​នោះ​វា​ត្រឹមត្រូវ​ ​វា​នឹង​ក្លាយជា​ការ​ដាក់​សម្ពាធ​លើ​សិទ្ធ​របស់​យើង​។​ ​ទទួលស្គាល់​ថា​បរិបទ​សង្គម​ ​ក្លាយ​ផ្នត់គំនិត​ ​ចឹង​ហើយ​បាន​ជា​កន្លងមក​មិន​មាន​នរណា​ហ៊ាន​បំបែក​នូវ​របាំង​នោះ​ដើម្បី​ធ្វើតាម​ការសម្រេច​ចិត្ត​របស់​ខ្លួន​។​»​

​វាគ្មិន​មួយ​រូប​ទៀត​ ​ជា​អតីត​តំណាង​រាស្ដ្រ​ខេត្តតាកែវ​ ​អ្នកស្រី​ទេព​ ​សុធី​បាន​បញ្ជាក់​ថា​ជា​ស្ដ្រី​ ​បើ​មិន​បង្ហាញ​គេ​ពី​សមត្ថភាព​យើង​ទេ​ ​គេ​នៅតែ​មិនសូវ​ឱ្យ​តម្លៃ​លើ​សមត្ថភាព​យើង​ ​បើ​ទោះបីជា​សម័យកាល​ដើរ​ដល់​នេះ​យ៉ាងណាក្ដី​។​

​អតីតកាល​ ​ជា​គ្រូបង្រៀន​ភាសាអង់គ្លេស​នៅ​សហរដ្ឋ​អាម៉េរិក​ ​ខណៈ​បច្ចុប្បន្ន​ជា​ម្ចាស់​ចម្ការ​ម្រេច​កំពត​ដែល​មាន​ឯករាជ្យ​លើ​ផ្នែក​ហិរញ្ញវត្ថុ​ផង​នោះ​ ​ស្ដ្រី​រូប​នេះ​បាន​និយាយ​ទាំង​ទឹកមុខ​ញញឹម​ផង​ ​និង​ស្រងូត​ស្រងាត់​ផង​ថា​៖​ ​«​ខ្ញុំ​ធំ​នៅ​អាម៉េរិក​ ​ព្រោះ​កាលណោះ​រត់​ភាស​ខ្លួន​ក្រោយ​សម័យ​ប៉ុ​លព​ត​(​សម័យ​កម្ពុជា​ប្រជាធិបតេយ្យ​)​។​ ​ខ្ញុំ​មិនដឹង​ទេ​ថា​ភាព​ស្អាតស្អំ​ ​គេ​បែប​ចែក​យ៉ាងណា​នៅ​ទីនោះ​។​ ​ខ្ញុំ​គ្រាន់តែ​ដឹង​ថា​ ​យើង​ជា​ស្ដ្រី​ធ្វើការ​ដូចគ្នា​ ​តែ​បាន​លុយ​តិច​ជាង​បុរស​។​ ​ខ្ញុំ​រៀន​ផ្នែក​នយោបាយ​នៅ​សាកល​វិទ្យាល័យ​។​ ​ខ្ញុំ​ធ្វើជា​គ្រូ​ភាសាអង់គ្លេស​ ​នៅ​អាម៉េរិក​បាន ១៣ឆ្នាំ​។​ ​តែ​ក្រោយមក​ខ្ញុំ​ឃើញ​នៅ​ប្រទេសខ្មែរ​ជួប​ការ​លំបាក​ ​ខ្ញុំ​ក៏​មានគំនិត​ចង់​មក​ជួយ​ខ្មែរ​។​ ​ចឹង​ក៏​ត្រឡប់​មក​ខ្មែរ​វិញ​នៅ​ឆ្នាំ២០១៣​។​ ​គិតទៅ​ឃ្លាតពី​ខ្មែរ​ជាង ៣០ឆ្នាំ​ហើយ​ ​អ្វី​ដែល​ខ្ញុំ​ចាំ​មើល​ពេលនេះ​ ​គឺថា​តើ​ស្ត្រី​ខ្មែរយើង​នឹង​អភិវឌ្ឍន៍​ខ្លួន​លឿន​ប៉ុណ្ណា​?​»​

​បន្ថែម​យោបល់​ក្រៅពី​អ្វី​ដែល​វាគ្មិន​នា​រីៗ​បាន​លើកឡើង​រឿង​ភាព​ស្អាតស្អំ​សម្រាប់​ស្ដ្រី​ ​បុគ្គលិក​អង្គការ​នារី​ដើម្បី​សន្តិភាព​(​Women​ ​Peace​ ​Makers​)​ ​លោក​ហៀង​ ​លី​ហួរ​ ​ថា​ខ្លួន​ពិតជា​ចង់ឱ្យ​បុ​រសៗ​ស្វែងយល់​ឱ្យ​ច្រើន​ពី​កង្វល់​របស់​ស្ត្រី​។​ ​យុវជន​នេះ​ថា​ ​ខ្លួន​ជា​បុរស​តែម្នាក់​ក្នុងចំណោម​ស្ត្រីជា​ច្រើន​រូប​នៅក្នុង​ក្រុម​ ​ដែល​ធ្វើការ​ច្រើន​ជាមួយ​ស្ដ្រី​ក្នុង​ន័យ​ទប់ស្កាត់​អំពើ​ហិង្សា​ ​និង​បញ្ហា​ប្រឈម​មួយចំនួន​ទៀត​លើ​ស្ដ្រី​ជាដើម​ ​ព្រោះ​មកដល់​បច្ចុប្បន្ន​ស្ដ្រី​នៅតែ​ជួបប្រទះ​បញ្ហា​គួរសម​ដែរ​។​ ​ជា​បុរស​ដែល​ធ្វើការ​ក្នុង​ស្ថាប័ន​ទាក់ទង​ច្រើន​ជាមួយ​បញ្ហា​ស្ដ្រី​ ​លី​ហួរ​ថា​ ​អ្នក​ជុំវិញ​ខ្លួន​ ​និង​គ្រួសារ​តែង​សាកសួរ​ជា​រឿយ​ៗ​ពី​មូលហេតុ​ដែល​គាត់​ជ្រើស​យក​ការ​ប្រឡូក​សកម្ម​ជាមួយ​អង្គការ​ដើម្បី​ស្ដ្រី​។​

​លី​ហួរ​៖​ ​«​គេ​សួរ​ខ្ញុំ​ថា​ ​ជា​គ្រូ​ភាសាអង់គ្លេស​ ​មិច​បាន​ចាំបាច់​ទៅ​ធ្វើការ​ស្ថាប័ន​ជាមួយ​ស្ដ្រី​?​ ​ម៉េច​មិន​ធ្វើការ​ឱ្យ​ត្រូវជា​មួយ​ជំនាញ​ដែល​សិក្សា​?​ ​គ្រួសារ​របស់ខ្ញុំ​សួរ​អ៊ឹ​ចឹង​ដែរ​។​ ​ខ្ញុំ​គិតថា​ ​អ្វី​ដែល​ខ្ញុំ​ជ្រើសរើស​ពិតជា​ត្រឹមត្រូវ​។​ ​បញ្ហា​ជម្លោះ​គួរ​ត្រូវ​បាន​ដោះស្រាយ​ ​ដោយ​ជំនួស​មកវិញ​នូវ​ ​ការ​កសាង​សន្តិភាព​ឱ្យ​ស្ដ្រី​។​ ​ការ​ធ្វើការ​ជាមួយ​ស្ដ្រី​ ​បាន​ធ្វើ​ឱ្យ​ខ្ញុំ​កាន់តែ​យល់ដឹង​ពី​ផលវិបាក​របស់​ពួកគាត់​។​ ​ស្ដ្រី​មាន​សមត្ថភាព​ដែល​គួរ​ត្រូវ​បាន​យកចិត្ត​ទុកដាក់​ជាពិសេស​ ​និង​គាំទ្រ​ឱ្យ​មាន​ភាពស្មើគ្នា​។​»​

​បន្ទាប់ពី​សំណួរ​ ​និង​ចម្លើយ​ជាបន្តបន្ទាប់​ ​ពីសំណាក់​វាគ្មិន​ ​និង​ទស្សនិកជន​ ​រឿង​ឃ្លា​ថា​ ​«​ភាព​ស្អាតស្អំ​»​ ​ក៏ដូចជា​បញ្ហា​ខ្លះ​ៗ​ដែល​ជា​រឿយ​ៗ​ត្រូវ​បាន​ស្ដី្រលើ​ក​ឡើង​ស្រដៀងគ្នា​នោះ​ ​វាគ្មិន​ម្នា​ក់ៗ​បាន​សរុប​ដោយ​បង្ហាញ​នូវ​ទស្សនៈ​ប្រហាក់​ប្រហែលគ្នា​ថា​ ​ស្ដ្រី​គ្រប់រូប​គួរ​មាន​ភាពជា​ខ្លួនឯង​ ​រឹងមាំ​ ​តស៊ូ​ ​និង​ប្រកាន់​នូវ​ឥរិយាបថ​ថ្លៃថ្នូរ​។​ ​ត្រង់នេះ​ ​ដើម្បី​ឱ្យ​ស្ត្រី​មាន​ភាពរឹងមាំ​ ​ពួកគេ​ត្រូវ​មានចំណេះ​ដឹង​ ​ភាព​ឯករាជ្យ​លើ​ផ្នែក​ហិរញ្ញវត្ថុ​ ​ដោយមាន​ការងារ​អាច​ចិញ្ចឹមជីវិត​បាន​ ​មាន​ភាពជា​ឯកជន​ ​មិន​បារម្ភ​ពី​សម្ពាធ​នានា​។​ ​ម្យ៉ាងទៀត​ ​ពួកគេ​មិន​ចាំបាច់​ទន្ទឹងរង់ចាំ​សង្គម​ឱ្យ​បង្កើត​ឱកាស​សម្រាប់​គេ​ឡើយ​ ​តែ​គេ​ត្រូវ​រៀន​បង្កើត​ឱកាស​ដោយខ្លួនឯង​៕​

​ប៉ា​ ​សុ​ខេង​ ​ត្រូវ​បាន​អញ្ជើញ​ឱ្យធ្វើ​ជា​វាគ្មិន​មួយ​រូប​ក្នុងចំណោម​ ​៥​ ​រូប​ ​ក្នុង​កម្មវិធី​ ​Reconstructing​ ​Roles​ ​of​ ​Women​ ​in​ ​Cambodia​។​

Share and Like this post

Related Posts

Previous Article

បក្ស​ប្រឆាំង​ទទួល​បាន​ជីវិត​ថ្មី​ ​តែ​គួរ​ចៀសចេញ​ប្រកាន់​ជំហរ​ប្រឈមមុខ​ដាក់គ្នា​

Next Article

Scholarships