ធនាគារ អេស៊ីលីដា បានប្រកាសឲ្យដឹងថា អតិថិជន​នាពេលបច្ចុប្បន្នអាច​បើក​គណនី និង​បោះពុម្ពបណ្ណ អេធីអឹម អេស៊ីលីដា (ATM Classic Card) តាមរយៈម៉ាស៊ីន​ VTM (Virtual Teller Machine) ឬ​ហៅ​ថា ម៉ាស៊ីន​បើក​គណនី។

ម៉ាស៊ីនបើកគណនីរបស់ធនាគារ​ អេស៊ីលីដាគឺជាប្រព័ន្ធស្វ័យប្រវត្ដិដែលអនុញ្ញាតឱ្យអតិថិជនបើកគណនីធនាគារដោយខ្លួនឯងបានគ្រប់ពេលវេលា និងឆាប់រហ័ស។

ម៉ាស៊ីនវីធីអឹម មានលក្ខណៈពិសេសក្នុងការកំណត់អត្តសញ្ញាណ និងទទួលស្គាល់អតិថិជន ដោយស្វ័យប្រវត្តិ ដែលមានដូចជា ឧបករណ៍ថតចម្លង-អានឯកសារអត្តសញ្ញាណ ប្រព័ន្ធកាមេរ៉ាសម្គាល់ផ្ទៃមុខ ឧបករណ៍ថតស្នាមម្រាមដៃ និងចុះហត្ថលេខាអេឡិចត្រូនិក។

ជាមួយគ្នានេះផងដែរ អតិថិជនអាចបើកគណនីធនាគារ (គណនីឯកត្តជន) តាមម៉ាស៊ីនវីធីអឹម ជាប្រាក់រៀល ដុល្លារអាមេរិក បាត និងអ៊ឺរ៉ូ ដែលមានដូចជា​ គណនីបញ្ញើសំចៃ រួមទាំងគណនីបើកប្រាក់បៀវត្ស គណនីចរន្ត និងគណនីបញ្ញើតាមតម្រូវការ។

យោងតាមធនាគារ អតិថិជនអាចចាប់ផ្តើមធ្វើប្រតិបត្តិការភ្លាមៗបន្ទាប់ពីទទួលបានបណ្ណ អេធីអឹម អេស៊ីលីដា (ATM Classic Card)។

លោកស្រី សុខ សោភា នាយិកាប្រតិបត្តិ​ជាន់ខ្ពស់​ទីផ្សារ​ នៃ​ធនាគារ អេស៊ីលីដា បាន​មាន​ប្រសាសន៍ឲ្យដឹងផងដែរ​ថា ៖ «កាលពីពេលកន្លងទៅ អតិថិជន​លោក​អញ្ជើញ​មក​បើក​គណនី​នៅ​ធនាគារ អេស៊ីលីដា  លោកត្រូវការ​ស្នើ​សុំ​បណ្ណ អេធីអឹម យក​ទៅ​ប្រើប្រាស់ ហើយ​ការស្នើសុំនេះ​ត្រូវ​រង់ចាំ​ពេល​វេលា​យ៉ាង​តិច​ណាស់ក៏ ៣ថ្ងៃដែរ។ ប៉ុន្តែ ឥឡូវ​នេះ មិន​ចាំបាច់​រង់ចាំ​ទៀតទេ។ ពេល​គាត់​អញ្ជើញ​មក​បើក​គណនី ហើយ​គាត់​ត្រូវការ​ស្នើ​សុំ​បណ្ណ អេធីអឹម (ATM Classic Card) គាត់​បោះពុម្ព​បណ្ណ​នេះ​ដោយ​ខ្លួន​ឯង បាន​ភ្លាមៗ ពី​ម៉ាស៊ីន​ដាក់​ប្រាក់​ស័្វយ​ប្រវត្តិ​របស់​ធនាគារ អេស៊ីលីដា ហៅថា VTM (Virtual Teller Machine) ដោយងាយស្រួល។»

លោកស្រី​​បន្ថែម​ទៀត​ថា នៅពេលបន្តិចទៀត អតិថិជន​ចង់​ដូរ​បណ្ណ​ចាស់​យក​បណ្ណ​ថ្មី ឬ​បណ្ណ​ខូច ឬ​បាត់​បណ្ណ គ្រាន់​តែ​លោក​អញ្ជើញ​មក​ដល់​ម៉ាស៊ីន​បើក​គណនី​ស័្វយប្រវត្តិ VTM គាត់​នឹង​បោះពុម្ពបណ្ណ​ចេញ​ពី​ម៉ាស៊ីន​បាន​ភ្លាមៗ ផងដែរ ។

យោងតាមការឲ្យដឹងពីធនាគារ ខ្លួនកំពុងតែច្នៃប្រឌិតនិងលើកកម្ពស់សេវាកម្មធនាគារស្វ័យប្រវត្តិកម្មដែលជាផ្នែកមួយនៃការផ្តោតរបស់ខ្លួនលើឌីជីថលនីយកម្ម។ អេស៊ីលីដាកំពុងធ្វើពិពិធកម្មផលិតផលធនាគាររបស់ខ្លួនដោយផ្តល់ជូនអតិថិជននូវជម្រើសថ្មីក្នុងរបៀបដែលពួកគេទទួលបានសេវាកម្មធនាគារ។

កាលពីពេលថ្មីៗនេះ ធនាគារ អេស៊ីលីដាភីអិលស៊ី ក៏បានបើកគណនី​ចរន្តផ្លើស (Current Account Plus) ដែល​ធនាគារ អេស៊ីលីដា ភីអិលស៊ី ផ្ដល់​អត្រា​ការប្រាក់​ដល់​អតិថិជន​ដែល​បាន​រក្សា​ប្រាក់​បញ្ញើ​ក្នុង​គណនី​តាម​ចំនួន​ដែល​បាន​កំណត់។

ធនាគារបានបន្ថែមទៀតថាអតិថិជនដែលបើកគណនី​ចរន្តផ្លើស នឹងអាចធ្វើប្រតិបត្តិការប្រចាំថ្ងៃបានយ៉ាងងាយស្រួលតាមរយៈទូរស័ព្ទដៃរបស់ពួកគេហើយនឹងទទួលបានការទូទាត់ការប្រាក់តាមសមតុល្យគណនីរបស់ពួកគេ។

លោកស្រីបានបន្ថែមទៀតថាគណនីថ្មីអាចត្រូវបានកំណត់សម្រាប់ការប្រើប្រាស់ប្រាក់រៀល ដុល្លារឬបាត ហើយអតិថិជននឹងមិនចាំបាច់ប្តូរតុល្យភាពក្នុងគណនីបច្ចុប្បន្នទៅគណនីសន្សំដើម្បីទទួលបានការប្រាក់ឡើយ។ ម្ចាស់គណនី​ចរន្តផ្លើស នឹងទទួលបានការប្រាក់រហូតដល់ ០,២ ភាគរយលើសមតុល្យរបស់ពួកគេ។

លោកស្រី សុខ សោភា បានបន្ថែមថាសេវាកម្មមួយទៀតដែលធនាគារផ្តល់គឺប្រាក់​បញ្ញើមាន​កាល​កំណត់ ។

លោកស្រីមានប្រសាសន៍ថាប្រាក់​បញ្ញើមាន​កាល​កំណត់របស់អេស៊ីលីដាគឺល្អបំផុតជាផ្នែកមួយនៃយុទ្ធសាស្រ្តវិនិយោគរួម។

លោកស្រីបន្តថាប្រសិនបើអតិថិជនរកឃើញថាពួកគេមានសមតុល្យដែលមិនត្រូវបានប្រើប្រាស់ទៀងទាត់នៅក្នុងគណនីរបស់ពួកគេ ពួកគេអាចបើកប្រាក់បញ្ញើមានកាលកំណត់តាមរយៈកម្មវិធីទូរស័ព្ទអេស៊ីលីដានិងទទួលបានការប្រាក់លើចំនួននោះ។

ជាមួយនឹងប្រាក់​បញ្ញើមាន​កាល​កំណត់របស់ធនាគារអេស៊ីលីដា អតិថិជនទទួលបានអត្រាការប្រាក់គួរឱ្យចាប់អារម្មណ៍ផ្អែកលើកញ្ចប់ដែលពួកគេជ្រើសរើស។

ពួកគេអាចជ្រើសរើសក្នុងការទទួលបានការប្រាក់ដែលផ្ដល់ជូនជារៀងរាល់ខែ នៅចន្លោះពេលបីខែឬនៅចុងបញ្ចប់នៃរយៈពេល។ ប្រាក់​បញ្ញើមាន​កាល​កំណត់របស់អតិថិជនក៏អាចត្រូវបានរក្សាទុកជាប្រាក់រៀល ដុល្លារ ឬបាតផងដែរ។

ចំនួនទឹកប្រាក់អប្បបរមាសម្រាប់បើកប្រាក់​បញ្ញើមាន​កាល​កំណត់របស់អេស៊ីលីដាត្រូវបានកំណត់ក្នុងចំនួន ២ ០០០ ០០០ រៀល ៥០០ ដុល្លារ ឬ ២០ ០០០ បាត។

សម្រាប់គណនីសន្សំ ការបើកឬបិទគណនីមិនគិតថ្លៃសេវាកម្ម ហើយកាតធនាគារត្រូវបានផ្ដល់ជូនដោយមិនគិតថ្លៃ។

លើសពីនេះទៀត សមតុល្យ​​អប្បបរមា មិន​តម្រូវនោះទេ ដែលជាគុណប្រយោជន៍ខុសគ្នាពីធនាគារផ្សេងទៀត៕

ប្រែសម្រួលដោយ ភុន ច័ន្ទឧសភា