cellcard cellcard cellcard

គ្រួសារខ្មែរថាមស៍បាត់បង់​សមាជិក​ដ៏ល្អ​ម្នាក់

ខ្មែរថាមស៍ Share:

កាសែតខ្មែរថាមស៍មានសេចក្តីទុក្ខក្រៀមក្រំជាអណេកកប្បការ ក្រោយពី​បាន​ទទួល​ដំណឹងថាថាលោក ជាង សុខា ជាអតីតនិពន្ធនាយករបស់យើងបានទទួលមរណភាពដោយសាររោគគាពាធក្នុងវ័យ ៤២ ឆ្នាំនាវេលាម៉ោង ៦ និង ៣០ នាទីនៅពេលព្រឹកនេះ។

អស់រយៈពេលជាង ២ ទសវត្សនៃអាជីពរបស់លោកនៅក្នុងវិស័យសារព័ត៌មាន លោកជាង សុខា គឺជាឥស្សរជនដ៏សំខាន់មួយរូបក្នុងការលើកកម្ពស់វិស័យសារព័ត៌មាននិងលទ្ធិប្រជាធិបតេយ្យនៅប្រទេសកម្ពុជា ព្រមទាំងត្រូវបានមនុស្ស​ជា​ច្រើនទទួលស្គាល់ផងដែរចំពោះវិជ្ជាជីវៈដ៏​មានកម្រិតខ្ពស់ ក៏ដូចជាភាពក្លាហាននិងភាពជាអ្នកដឹកនាំរបស់​លោក។

លោកជាង សុខា បានចូលរួមជាមួយកាសែតខ្មែរថាមស៍នៅឆ្នាំ ២០១៥ ហើយក្នុងរយៈពេល ៥ ឆ្នាំកន្លងទៅបានចូលរួមចំណែកយ៉ាងសម្បើមក្នុងដំណើររបស់កាសែតខ្មែរថាមស៍ឆ្ពោះទៅ​រក​កា​រក្លាយជា​កាសែតដែលមានការរីកចម្រើនលឿនជាងគេនៅក្នុងតំបន់ និងជាសារព័ត៌មានភាសាអង់គ្លេសលេចធ្លោជាងគេនៅកម្ពុជា។

លោកត្រូវបានគេកំណត់ឱ្យចូលកាន់មុខតំណែងជានិពន្ធនាយកកាសែតខ្មែរថាមស៍វិញនៅថ្ងៃទី ៤ ខែមករាឆ្នាំ ២០២១ ក៏ប៉ុន្តែអការៈជំងឺរបស់លោក​បាន​រារាំងលោក​ក្នុង​ការ​ត្រលប់​មក​រក​ការ​បំពេញ​ការងារវិញបាន។

ការចូលរួមវិភាគទានយ៉ាងច្រើនរបស់​លោក​ ជាង សុខា ដល់វិស័យសារព័ត៌មានរបស់ព្រះរាជាណាចក្រកម្ពុជាត្រូវបានទទួលស្គាល់ជាផ្លូវការដោយរាជរដ្ឋាភិបាលកម្ពុជាក្នុងឆ្នាំ ២០១៩ នៅពេលដែលលោកត្រូវបានតែងតាំងជាទីប្រឹក្សាក្រសួងព័ត៌មាន។

គ្រួសាររបស់លោក ជាង សុខានៅថ្ងៃនេះ បាត់បង់ស្វាមីដ៏អស្ចារ្យនិងឪពុកប្រកបដោយ​ព្រហ្មវិហារធម៌ម្នាក់ ប៉ុន្តែសម្រាប់បុគ្គលិកទាំងអស់នៅកាសែតខ្មែរថាមស៍ ការ​បាត់បង់​លោក​ ជាង សុខា ជាការបាត់បង់មេដឹកនាំនិងសហការីម្នាក់ដែលតែងតែបង្ហាញពីក្តីស្រឡាញ់និងការគាំទ្រដោយគ្មានលក្ខខណ្ឌ និងមិនដែលស្ទាក់ស្ទើរក្នុងការលះបង់ដើម្បីប្រយោជន៍រួម។

កាសែត​ខ្មែរថាមស៍​សូមចូលរួម​រម្លែក​មរណទុក្ខជាមួយគ្រួសារ មិត្តភក្តិ និង​មិត្ត​រួម​ការងារ​របស់​លោក ជាង សុខា និង​សូម​បួងសួង​ឲ្យវិញ្ញាណក្ខន្ធរបស់​លោក​បានទៅដល់​សុគតិភព៕

Related Posts

Previous Article

ខេត្តមណ្ឌលគីរីត្រូវបានសិក្សាជាទីតាំងសម្រាប់ថាមពលអគ្គិសនីដើរដោយកំលាំងខ្យល់

Next Article

កម្លាំងយោធាចាប់បាន «មេខ្យល់» ដែលព្យាយាមនាំពលករលួចចូលទៅប្រទេសថៃ