cellcard cellcard cellcard

ផលិតកម្ម​បន្លែ​ក្នុងស្រុក​កើនឡើង​ក្នុង​ឆ្នាំ ២០២០

​ជា វណ្ណ​យុទ្ធ / Khmer Times Share:
បុគ្គលិក​បម្រើការ​នៅ​កសិដ្ឋាន Happy + Co Farm ក្នុង​ខេត្តសៀមរាប​។ ​ សហការី

ក្រសួងកសិកម្ម រុក្ខាប្រមាញ់ និង​នេសាទ​បាន​ឲ្យ​ដឹងថា​ផលិតកម្ម​បន្លែ​ក្នុងស្រុក​បាន​កើនឡើង​នៅ​ឆ្នាំ ២០២០ ដែល​កើតឡើង​ដោយសារតែ​កិច្ចខិតខំ​របស់​រដ្ឋាភិបាល​ក្នុង​ការជំរុញ​ចង្វាក់​ផលិតកម្ម​។​

aba

​រដ្ឋមន្ត្រី​ក្រសួងកសិកម្ម លោក វេ​ង សាខុន បាន​មានប្រសាសន៍ថា​ផលិតកម្ម​បន្លែ​ក្នុងស្រុក​មាន​ចំនួន ៧១៦ ១១៣ តោន​ក្នុង​ឆ្នាំ ២០២០ កើនឡើង ៥ ភាគរយ បើ​ធ្វើការ​ប្រៀបធៀប​ទៅនឹង​ឆ្នាំ ២០១៩ ដែលមាន​ចំនួន ៦៨១ ០៩៩ តោន​។​

​លោក​បន្តថា​ការប្រើប្រាស់​បន្លែ​កាលពី​ឆ្នាំមុន​នៅ​កម្ពុជា​ត្រូវបាន​ប៉ាន់ប្រមាណ​ជាមាន​ចំនួន ១ លាន​តោន​។​

​លោក​ថា​៖ «​ផលិតកម្ម​បន្លែ​ក្នុងស្រុក​កាលពី​ឆ្នាំមុន​មាន​ប្រមាណ​ជា ៦៨ ភាគរយ​នៃ​ការប្រើប្រាស់​សរុប​»​។ លោក​បន្តថា​បន្លែ​ដែល​នាំចូល​ជាទូទៅ​គឺ​បន្លែ​ដែល​មិន​ត្រូវបាន​ដាំ​ដុះ​នៅក្នុង​ប្រទេស​កម្ពុជា​ដោយសារតែ​បញ្ហា​អាកាសធាតុ​។​

​លោក​បាន​បន្ថែមទៀតថា​និន្នាការ​ឆ្ពោះទៅរក​ការប្រើប្រាស់​អាហារ​ដែលមាន​សុវត្ថិភាព​រួមមាន​បន្លែ ផ្លែឈើ និង​សាច់​ហាក់ កំពុងតែ​មានការ​កើនឡើង​។​

​លោក​ថា​៖ «​ឆ្លើយតប​ទៅនឹង​តំរូវការ​នេះ រដ្ឋាភិបាល​កម្ពុជា​លើកទឹកចិត្ត​និង​គាំទ្រ​ដល់​ប្រជាជន​ក្នុងការ​បង្កើន​ផលិតកម្ម​បន្លែ​ក្នុងស្រុក​ដើម្បី​ផ្គត់ផ្គង់​ទីផ្សារ​ក្នុងស្រុក បង្កើន​ប្រាក់ចំណូល បង្កើត​ការងារ​និង​បង្កើត​ឱកាស​នាំចេញ​»​។​

​ជាមួយគ្នានេះ​ផងដែរ លោក វេ​ង សាខុន ក៏បាន​ថ្លែងអំណរគុណ​ដល់ដៃ​គូ​អភិវឌ្ឍន៍​របស់​ក្រសួង​រួមមាន​កម្មវិធី​ផ្សព្វផ្សាយ​បច្ចេកទេស​កសិកម្ម​ថ្មី​ដែល​ធន់​ទៅនឹង​ការប្រែប្រួល​អាកាសធាតុ (ASPIRE) និង​គម្រោង​ពិពិធ​កម្មវិស័យ​កសិកម្ម​នៅ​កម្ពុជា​។​

​លោក​ថា​៖ «​តាមរយៈ​កិច្ចសហប្រតិបត្តិការ​នេះ ក្រសួង​សង្ឃឹម​យ៉ាង​មុតមាំ​ថា​នៅពេល​អនាគត​ប្រទេស​កម្ពុជា​នឹង​ផលិត​បន្លែ​មាន​សុវត្ថិភាព​គ្រប់គ្រាន់​នៅក្នុង​ស្រុក​ដើម្បី​ផ្គត់ផ្គង់​ទាំង​ទីផ្សារ​ក្នុងស្រុក​និង​ទីផ្សារ​នាំចេញ​»​។​

​យោងតាម​ទិន្នន័យ​ពី​រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ បានឱ្យដឹងថា​ព្រះរាជាណាចក្រ​កម្ពុជា​បាន​នាំចេញ​ផលិតផល​កសិកម្ម​ក្នុង​ទំហំ​ទឹកប្រាក់​ចំនួន ៤ ពាន់​លាន​ដុល្លារ​ក្នុង​ឆ្នាំ ២០២០ ។​

​ការនាំចេញ​ទាំងនោះ​រួមមាន​ផលិតកម្ម​ស្រូវ អង្ករ ដំឡូង​មី គ្រាប់ស្វាយចន្ទី ស្វាយ កៅស៊ូ ចេក មៀន​ប៉ៃលិន ម្រេច សំបុក​ត្រចៀកកាំ ផលិតផល​ជលផល ផលិតផល​សត្វ ផលិតផល​ព្រៃឈើ និង​ទំនិញ​ផ្សេងទៀត​។​

​លោក វេ​ង សាខុន បាន​ឲ្យ​ដឹងផង​ដែរ​ថាបើ​ទោះបីជា​ប្រទេស​កម្ពុជា​នៅតែ​ពឹង​ផ្អែកលើ​ការនាំ​ចូល​បន្លែ​ដើម្បី​បំពេញ​តំរូវការ​ការប្រើប្រាស់​ក៏ដោយ ក៏​ព្រះរាជាណាចក្រ​កម្ពុជា​បាន​នាំចេញ​បន្លែ​បន្តិចបន្តួច​ដែល​ភាគច្រើន​ទៅកាន់​ប្រទេស​មួយចំនួន​នៃ​សហភាព​អឺរ៉ុប​។​

​គួរបញ្ជាក់​ឲ្យ​ដឹងផង​ដែរ​ថា បច្ចុប្បន្ន ប្រទេស​កម្ពុ​ជាមាន​ផ្ទៃដី ៦ ម៉ឺន​ហិកតា​ដែល​កំពុង​ដាំ​ដុះ​បន្លែ​នៅតាម​កសិដ្ឋាន​នានា​ទូទាំងប្រទេស​៕

​ប្រែ​សម្រួល​ដោយ ភុ​ន ច័ន្ទ​ឧសភា​

Related Posts

Previous Article

មន្ទីរ​កសិកម្ម​ស្វែងរក​មាន់​ឈឺ និង​ងាប់​បន្ទាប់ពី​មានការ​ផ្ទុះឡើង​នៃ​ជំងឺផ្តាសាយបក្សី​

Next Article

ក្រុម​គ្រួសារ​ជន​រងគ្រោះ​ក្នុង​ហេតុ​ការណ៍​បាក់​អគារ​នៅ​កែប​នៅតែ​បន្ត​ស្វែងរក​យុត្តិ​ធម៍​