cellcard cellcard cellcard

ចំណូល​បាន​មក​ពី​ផលិតកម្ម​ប្រេង​នឹង​ត្រូវ​ប្រើប្រាស់​ដើម្បី​ជំរុញ​ការ​អប់រំ​ឌីជីថល​

Jason Boken / Khmer Times Share:
សហការី

​រដ្ឋាភិបាល​បាន​ប្រកាស​ថា​ខ្លួន​នឹង​ប្រើប្រាស់​ចំណូល​បាន​មក​ពី​ផលិតកម្ម​ប្រេង​នាពេល​អនាគត​ក្នុងការ​លើកកម្ពស់​ការ​អប់រំ​ឌីជីថល​ដែល​ត្រូវបាន​បង្កើត​ឡើង​ដើម្បី​ឆ្លើយតប​នឹង​តម្រូវការ​ក្នុងស្រុក​សម្រាប់​បុគ្គលិក​បច្ចេកទេស​និង​ជំនាញ​។​

aba

​ថ្លែង​ក្នុងឱកាស​បើក​បវេសនកាល​ឆ្នាំ​សិក្សា​កាលពី​ម្សិលមិញ លោកនាយក​រដ្ឋមន្ត្រី ហ៊ុន សែន បានស្នើ​ដល់​ក្រសួង​អប់រំ​ក្នុងការ​ជំរុញ​ការផ្លាស់ប្តូរ​ឌីជីថល​ក្នុង​វិស័យ​អប់រំ​តាមរយៈ​ការបណ្ដុះបណ្ដាល​ទេពកោសល្យ​ឆ្ពោះទៅរក​សមត្ថភាព​ច្នៃប្រឌិត​ដែល​ឆ្លើយតប​ទៅនឹង​តម្រូវការ​នៃ​សតវត្សរ៍​ទី ២១ ។​

​សកម្មភាព​នេះ​ពាក់ព័ន្ធ​នឹង​ការផ្តោត​ការយកចិត្តទុកដាក់​លើ​សកម្មភាព​បង្រៀន​នៅក្នុង​ជំនាញ​វិទ្យាសាស្ត្រ បច្ចេកវិទ្យា វិស្វកម្ម និង​គណិតវិទ្យា STEM ។​

​នៅក្នុង​សេចក្តីប្រកាស​ដដែល លោកនាយក​រដ្ឋមន្ត្រី​បានលើកឡើង​ពី​ភាពចាំបាច់​សម្រាប់​ក្រសួង​ដើម្បី​បន្ត​កែលម្អ​និង​អភិវឌ្ឍ​ហេដ្ឋារចនាសម្ព័ន្ធ​សាលារៀន​រួមមាន​អាគារ ថ្នាក់រៀន បន្ទប់ពិសោធន៍ និង​បន្ទប់​កុំព្យូទ័រ​។ លោក​បាន​លើកឡើងថា​ការសិក្សា​រៀនសូត្រ​ប្រកបដោយ​បរិយាកាស​ស្រស់ស្អាត​គួរតែ​ត្រូវបាន​បង្កើតឡើង ដែលជា​កន្លែង​ផ្តល់​ទឹកស្អាត បង្គន់​អនាម័យ និង​សួនច្បារ​។​

​លោក ហ៊ុន សែន បន្តថា​ខណៈដែល​ប្រទេស​កម្ពុជា​ដែល​បាន​ទាញយក​ផលិតកម្ម​ប្រេង​ដំបូង​របស់ខ្លួន​ដោយ​ជោគជ័យ រដ្ឋាភិបាល​បាន​ប្តេជ្ញា​ថា​នឹង​ប្រើប្រាស់​ចំណូល​បានមកពី​ផលិតកម្ម​ប្រេង​ឲ្យ​បានល្អ​ប្រសើរ​ក្នុងការ​អភិវឌ្ឍ​វិស័យ​អប់រំ​និង​វេជ្ជសាស្ត្រ​។​

​លោក​បន្ថែមថា​ចំណូល​ពី​ប្រេង​របស់​ប្រទេស​កម្ពុជា​នឹង​ជួយ​ជា​ថវិកា​សម្រាប់​ការច្នៃប្រឌិត​ឌីជីថល​ដែល​ត្រូវការ​ជា​ចាំបាច់​នៅក្នុង​វិស័យ​អប់រំ​។​

​ការទាញយក​ផលិតកម្ម​ប្រេង​ដំបូង​របស់​កម្ពុជា នៅ​តំបន់​ប្លុក A នៃ​ឈូង​សមុទ្រ​កម្ពុជា​គឺជា​ព្រឹត្តិការណ៍​ជា​ប្រវត្តិសាស្ត្រ​មួយ​សម្រាប់​ប្រទេសជាតិ​។​

​រដ្ឋាភិបាល​គ្រោង​នឹង​ប្រើ​ប្រាក់ចំណូល​ដែល​ទទួលបាន​ដើម្បី​ផ្តល់​មូលនិធិ​ដល់​កម្មវិធី​ផ្សេងៗ​គ្នា​ដើម្បី​កែលំអ​ការអប់រំ​ឌីជីថល​នៅក្នុង​ប្រទេស​កម្ពុជា​ដោយមាន​ជំនួយ​ពី​ក្រសួង​អប់រំ​ជាមួយ មជ្ឈមណ្ឌល​អន្តរជាតិ​យូ​នី​ស្កូ ដើម្បី​ភាព​ច្នៃប្រឌិត​ការអប់រំ​កម្រិត​ឧត្ដមសិក្សា UNESCO-ICHEI ដើម្បី​ធ្វើ​ពិពិធ​កម្ម​ការអប់រំ​ឧ​ត្ត​ម​សិក្សា​និង​ផ្តោតលើ​កម្មវិធី​ឌីជីថល​កាន់តែច្រើន​។​

​កម្មវិធី​អប់រំ​ឌីជីថល​គឺជា​ផ្នែក​មួយ​នៃ​គោលនយោបាយ​របស់​រដ្ឋា​ភិ​បាល​ទាក់ទង​នឹង​ទិសដៅ​នៃ​សេដ្ឋកិច្ច​ឌីជីថល​កម្ពុជា​។​

​លោក រស់ សុ​វាចា អ្នកនាំពាក្យ​ក្រសួង​អប់រំ យុវជន និង​កីឡា បាន​មានប្រសាសន៍​កាលពីពេល​កន្លងទៅ​ថា​ផែនការ​នេះ​គឺ​ដើម្បី​លើកកម្ពស់​ការអប់រំ​ឌីជីថល​តាមរយៈ​កម្មវិធី​ព័ត៌មានវិទ្យា​និង​បច្ចេកវិទ្យា​គមនាគមន៍​ដែលជា​ឧបករណ៍​សម្រាប់​បង្រៀន​និង​សិក្សា​រៀនសូត្រ​។​

​លោក​ថា​៖ «​វា​មាន​គោលបំណង​ដើម្បី​ធានាថា​សិស្សានុសិស្ស​កម្ពុជា​ទាំងអស់​បញ្ចប់​ការសិក្សា​ជាមួយនឹង​ចំណេះដឹង​និង​ជំនាញ​ដែល​នឹង​ជួយ​ពួកគេ​ឱ្យ​បន្ត​ការសិក្សា​និង​ធ្វើការ​ប្រកបដោយ​វិជ្ជាជីវៈ​»​។​

​លោក​បន្ថែមថា​៖ «​ខ្ញុំ​ជឿជាក់ថា​អាទិភាព​នៃ​ការអប់រំ​ឌីជីថល​ជាពិសេស​នៅក្នុង​បរិបទ​នៃ​វីរុស​កូ​វីដ​១៩ នឹង​ជំរុញ​ឱ្យ​ក្រសួង ស្ថាប័ន ដៃគូ​អភិវឌ្ឍន៍ និង​អ្នកពាក់ព័ន្ធ​នានា​ណែនាំ​កម្មវិធី​បន្ថែមទៀត​ដើម្បី​គាំទ្រ​គំនិត​ផ្តួចផ្តើម​នេះ​»​។​

​កាលពី​ចុងឆ្នាំ ២០២០ កន្លងទៅ ប្រទេស​កម្ពុជា​បានចាប់ផ្តើម​ទាញយក​ផលិតកម្ម​ប្រេង​ដំបូង​របស់ខ្លួន​ក្នុង​ឈូង​សមុទ្រ​ថៃ​។ ការបណ្តាក់ទុន​រួមគ្នា​រវាង​រដ្ឋាភិបាល​ក​ម្ពុ​ជា​និង​ក្រុមហ៊ុន​របស់​ប្រទេស​សឹង្ហ​បូរី KrisEnergy Ltd បានចាប់ផ្តើម​ផលិត​ហើយនឹង​ត្រូវ​អភិវឌ្ឍ​អណ្តូង​ថ្មី​នៅ​ប៉ុន្មាន​ខែ​ខាងមុខនេះ​។​

​ប្រទេស​កម្ពុជា​បាន​រកឃើញថា​ខ្លួន​អាច​ទាញយក​តំណក់​ប្រេង​នៅ​ឈូង​សមុទ្រ​របស់ខ្លួន​អស់​រយៈពេល​ជាង​មួយ​ទសវត្សរ៍​មកហើយ ខណៈដែល​ក្រុមហ៊ុន​ប្រេង​ផ្សេងទៀត​ដូចជា Chevron បាន​វិនិយោគ​នៅក្នុង​ការរុករក​រ៉ែ​នៅ​ឯនាយសមុទ្រ​របស់​ប្រទេស​កម្ពុជា​នាពេល​កន្លងមក​។ ប៉ុន្តែ​ផលិតកម្ម​ត្រូវបាន​ពន្យា​ពេល​អស់​ជាច្រើន​ឆ្នាំ​ដោយសារតែ​ក្រុមហ៊ុន​មានការ​ភ័យខ្លាច​ចំពោះ​តម្លៃ​ប្រេង​ទាប​ហើយ​ដោយសារតែ​រដ្ឋាភិបាល​កម្ពុជា​មិនអាច​ឈានដល់​កិច្ចព្រមព្រៀង​លើ​ផលិតកម្ម​ជាមួយ​ក្រុមហ៊ុន​ប្រេង​ណាមួយ​។​

​ទីតាំង​ទាំងនោះ​នឹង​ចាប់ផ្តើម​ជាមួយនឹង​ការផលិត​ប្រេង​ប្រមាណ​ជា ៧៥០០ បារ៉ែល​ក្នុង​មួយថ្ងៃ​ដែលជា​ចំនួន​តិចតួច ខណៈដែល​ប្រទេស​រុស្ស៊ី​ផលិត​បាន​ជាង ១០ លាន​បារ៉ែល​ក្នុង​មួយថ្ងៃ និង​ថៃ​ផលិត​ច្រើនជាង​ប្រទេស​កម្ពុជា​។ ទោះបីជា​ទិន្នផល​ដែល​ទទួលបាន​មាន​ចំនួន​តិចតួច បរិមាណ​នេះ​ត្រូវបាន​រាយការណ៍​ថា​នឹង​បង្កើត​ប្រាក់ចំណូល​ថ្មី​ចំនួន ៥០០ លាន​ដុល្លារ​សម្រាប់​កម្ពុជា​។​

​រដ្ឋាភិបាល​នៃ​ព្រះរាជាណាចក្រ​កម្ពុជា​ជឿជាក់ថា​នឹងមាន​ប្រេង​រាប់រយ​លាន​បារ៉ែល​ដើម្បី​បូម​ចេញពី​ដែនទឹក​របស់ខ្លួន​។ ប្រាក់ចំណូល​អាច​នឹង​បង្កើន​សក្តានុពល ខណៈដែល​ទីតាំង​អណ្តូង​ថ្មី​ត្រូវបាន​បង្កើត​បន្ទាប់ពី​ដំណាក់កាល​ដំបូង​នៃ​គម្រោង​៕

​ប្រែ​សម្រួល​ដោយ ភុ​ន ច័ន្ទ​ឧសភា​

Related Posts

Previous Article

ARDB ផ្តល់ថវិកាចំនួន ២៤៥ លានដុល្លារដល់អ្នកផលិតក្នុងវិស័យកសិកម្ម អ្នកនាំចេញ សហគ្រាសធុនតូច និងមធ្យម

Next Article

ទីផ្សារ​អាហារ​បំប៉ន​មាន​ការ​កើន​ឡើង​ខណៈ​ដែល​ប្រជា​ពលរដ្ឋ​កាន់​តែ​ច្រើន​គិតគូ​ពី​សុខភាព​