cellcard cellcard cellcard

សមាគម​មីក្រូ​ហិរញ្ញវត្ថុ​កម្ពុជា​ថ្លែង​ថា​ស្ថាប័ន​ជា​សមាជិក​បាន​រៀបចំ​ឥណទាន​ឡើង​វិញ​ចំនួន ១,៣៨ ពាន់​លាន​ដុល្លារ​

សុខ ចាន់ / Khmer Times Share:
គិត​ត្រឹម​ថ្ងៃទី ៣ ខែមករា ឥណទាន​ជាង ១,៣៨ ពាន់​លាន​ដុល្លារ​ត្រូវបាន​រៀបចំ​ឡើងវិញ​ដោយ​ស្ថាប័ន​ជា​សមាជិក​នៃ​សមាគម​មីក្រូហិរញ្ញវត្ថុ​កម្ពុជា​។ KT/​ទេព សូ​នី​

សមាគម​មីក្រូ​ហិរញ្ញវត្ថុ​កម្ពុជា (CMA)​បាន​ប្រកាស​ថា​គិត​ត្រឹម​ថ្ងៃទី ៣ ខែមករា សមាជិក​នៃ​សមាគម​បានរៀបចំ​ឥណទាន​ឡើងវិញ​ដែលមាន​ទំហំ​ទឹកប្រាក់​ចំនួន ១,៣៨២ ពាន់​លាន​ដុល្លារ​។ ចំនួន​សរុប​នៃ​ការស្នើសុំ​រៀបចំ​ឥណទាន​ឡើងវិញ​មាន​ចំនួន ៣០៣ ៥៩៣ ក្នុងនោះ ២៨៥ ២៣៤ ត្រូវបាន​អនុញ្ញាត​។​

aba

​សមាគម​ក៏បាន​បញ្ជាក់​ផងដែរ​ថា​សំណើរ​សម្រាប់​ការរៀបចំ​ឥណទាន​ឡើងវិញ​ក្នុង​រយៈពេល​បួន​ខែ​ចុង​ក្រោយនេះ​ដំណើរការ​ទៅដោយ​រលូន ដោយមាន​ពាក្យស្នើសុំ​ជាង ១០០០ ក្នុង​មួយ​សប្តាហ៍​។​

​សមាជិកភាព​របស់​ស​មា​គម​រួមមាន​ធនាគារ​ចំនួន ៤ គ្រឹះស្ថាន​មីក្រូហិរញ្ញវត្ថុ​ទទួល​ប្រា​ក់ប​ញ្ជើ (MDIs) ចំនួន ៦ គ្រឹះស្ថាន​មីក្រូហិរញ្ញវត្ថុ (MFIs) ចំនួន ៦៩ ស្ថាប័ន​ភតិសន្យា​ហិរញ្ញវត្ថុ​ចំនួន ១១ និង​ប្រតិបត្តិ​ករ​ឥណទាន​ជនបទ​ចំនួន ១៩ ។ សមាជិក​ធនាគារ​ទាំង​បួន​រួមមាន​ធនាគារ Hattha Bank, Phillip Bank, SBI  LY HOUR Bank Plc និង AEON Specialized Bank Cambodia​។​

​លោក សាយ សូ​នី អនុប្រធាន​នាយក​ប្រតិបត្តិ​របស់​ប្រា​សាក់ បាន​មានប្រសាសន៍ថា​ចំនួន​នៃ​សំណើ​ដែល​ពួកគេ​កំពុង​ទទួលបាន​សម្រាប់​ការរៀបចំ​ឥណទាន​ឡើងវិញ​បាន​ធ្លាក់ចុះ ដោយ​ភាគច្រើន​នៃ​សំណើ​ទាំងនោះ​គឺ​មកពី​អាជីវកម្ម​ដែល​ទាក់ទង​នឹង​វិស័យ​ទេសចរណ៍​។​

​លោក​បន្តថា​គិត​ត្រឹម​ថ្ងៃទី ៣១ ខែធ្នូ ប្រាក់កម្ចី​សរុប​របស់​ប្រា​សាក់​បាន​កើនឡើង​ដល់ ៣,០៣ ពាន់​លាន​ដុល្លារ ដោយមាន​ត្រឹមតែ ០,៩៩ ភាគរយ​ប៉ុណ្ណោះ​ដែល​ស្ថិតក្នុង​ស្ថានភាព​ប្រាក់កម្ចី​មិន​ដំណើរការ​។ ប្រាក់​បញ្ញើ​បាន​កើន​ដល់ ២,០៦១ ពាន់​លាន​ដុល្លារ​នៅ​ចុងឆ្នាំ​នេះ​។​

​លោក​បន្ថែមថា​៖ «​សកម្មភាព​អាជីវកម្ម​ជាច្រើន​បាន​ត្រលប់​មកវិញ ហើយ​វិស័យ​មីក្រូហិរញ្ញវត្ថុ​នៅតែ​បន្តដំណើរ​ការ​ទៅ​យ៉ាង​ល្អ​ទាំង​គុណភាព​និង​បរិមាណ​»​។​

​ធនាគារជាតិ នៃ​កម្ពុជា​បាន​អនុញ្ញាតិ​ឱ្យ​ធនាគារ និង​គ្រឹះស្ថាន​មីក្រូហិរញ្ញវត្ថុ​បន្ត​រៀបចំ​ឥណទាន​ឡើងវិញ​សម្រាប់​អតិថិជន​ដែល​រងគ្រោះ​ដោយ​គ្រោះទឹកជំនន់ និង​ករណី​ជម្ងឺ​រាតត្បាត​រហូតដល់​ពាក់​កណ្តាល​ឆ្នាំ ២០២១ ។ សំណើរ​រៀបចំ​ឥណទាន​ឡើងវិញ​ដែល​សមស្រប​គឺ​ផ្អែកលើ​ការវាយតម្លៃ​ជាក់ស្តែង​ដែល​ធ្វើឡើង​ដោយ​ស្ថាប័នហិរញ្ញវត្ថុ​។​

​ធនាគារជាតិ នៃ​កម្ពុជា​បាន​បន្តថា​ខ្លួន​ពង្រឹង​ការត្រួតពិនិត្យ​វិស័យ​ធនាគារ​និង​ត្រៀម​ចេញ​វិធានការណ៍​ប្រុងប្រយ័ត្ន​និង​ការគាំទ្រ​ផ្សេងៗ​ទៀត​ដែល​ចាំបាច់​ដើម្បី​រក្សា​និរន្តរភាព ភាព​ធន់ និង​កម្រិត​នៃ​ការជឿទុកចិត្ត​នៅក្នុង​វិស័យ​ធនាគារ​នៅ​កម្ពុជា​។​

​ធនាគារជាតិ នៃ​កម្ពុជា​បាន​បន្ថែមទៀតថា​វិស័យ​ធនាគារ​និង​ហិរញ្ញវត្ថុ​នៅតែ​បន្ត​ដើរតួនាទី​យ៉ាងសំខាន់​ក្នុងការ​គាំទ្រ​ដល់​សកម្មភាព​សេដ្ឋកិច្ច​របស់​ប្រទេស ក៏ដូចជា​រួមចំណែក​ដ​ល់​ការថែរក្សា​គោលការណ៍​ម៉ាក្រូសេដ្ឋកិច្ច និង​ហិរញ្ញវត្ថុ​។​

​ធនាគារជាតិ នៃ​កម្ពុជា​បន្តទៀតថា​ប្រព័ន្ធ​ធនាគារ​នៅតែ​បន្ត​ផ្តល់​ឥណទាន​ប្រកបដោយ​ការទទួលខុសត្រូវ លើកកម្ពស់​ការយល់ដឹង​អំពី​ចំណេះដឹង​ហិរញ្ញវត្ថុ និង​ធានាឱ្យមាន​ការចូលរួម​ពី​សាធារណជន ទន្ទឹមនឹង​ការពង្រឹង​ការការពារ​អតិថិជន និង​លើកកម្ពស់​គុណភាព និង​តម្លាភាព​នៃ​ប្រព័ន្ធ​ចែករំលែក​ព័ត៌មាន​ឥណទាន​។ កត្តា​ទាំងនេះ​នឹង​រួមចំណែក​ដល់​ការថែរក្សា​ស្ថេរភាព​ហិរញ្ញវត្ថុ និង​ការចៀសវាង​ការ​ជំពាក់​បំណុល​ក្នុង​ចំនួន​ច្រើន​លើសលប់​ក្នុងចំណោម​ប្រជាជន​៕

​ប្រែ​សម្រួល​ដោយ ភុ​ន ច័ន្ទ​ឧសភា​

Related Posts

Previous Article

ទីផ្សារ​អាហារ​បំប៉ន​មាន​ការ​កើន​ឡើង​ខណៈ​ដែល​ប្រជា​ពលរដ្ឋ​កាន់​តែ​ច្រើន​គិតគូ​ពី​សុខភាព​

Next Article

ការ​នាំ​ចេញ​របស់​កម្ពុជា​ទៅ​កាន់​សហរដ្ឋ​អាមេរិក​មាន​ការ​កើន​ឡើង​