cellcard cellcard cellcard

ការប្រយុទ្ធ​ប្រឆាំងនឹង​ជំងឺអេដស៍​នៅតែ​ជា​រឿង​អាទិភាព​សម្រាប់​រដ្ឋាភិបាល​

ស សុជាតិ / Khmer Times Share:
​ប្រជាជន​នៅក្នុង​ភូមិ​មួយ​ក្នុង​ខេត្តបាត់ដំបង​នៃ​ប្រទេស​កម្ពុជា​បាន​តាមដាន​រក​មេរោគ​អេដស៍​។ AFP

​រដ្ឋាភិបាល​កម្ពុជា​បានបញ្ជាក់​ជាថ្មី​ពី​ការប្តេជ្ញាចិត្ត​របស់ខ្លួន​ក្នុងការ​ប្រយុទ្ធ​ប្រឆាំងនឹង​មេរោគ​អេដស៍ / ជំងឺអេដស៍ ហើយ​ថ្ងៃនេះ​គឺជា​ទិវា​ពិភពលោក​ប្រយុទ្ធ​ប្រឆាំងនឹង​ជំងឺអេដស៍​។​

​លោកនាយក​រដ្ឋមន្ត្រី ហ៊ុន សែន បានធ្វើ​សេចក្តីថ្លែងការណ៍​មួយ​ដើម្បី​កត់សម្គាល់​ព្រឹត្តិការណ៍​នេះ​និង​ដើម្បី​ធ្វើ​កិច្ចសហប្រតិបត្តិការ​ជាមួយ​យុទ្ធនាការ​សកល​ប្រឆាំងនឹង​ជំងឺអេដស៍​ក្រោម​ប្រធានបទ សាមគ្គី​ភាពជា​សកល និង​ការទទួលខុសត្រូវ​រួមគ្នា​។​

​យោងតាម​សេចក្តីថ្លែងការណ៍​របស់​នាយករដ្ឋមន្ត្រី​ដែល​បាន​ចុះហត្ថលេខា​កាលពី​ថ្ងៃ​ពុធ រដ្ឋាភិបាល​នៅតែ​ចាត់ទុក​មេរោគ​អេដស៍ / ជំងឺអេដស៍​ជា​អាទិភាព​ខ្ពស់​ព្រោះ​វា​ជាការ​គំរាមកំហែង​ដល់​សុខភាព​សាធារណៈ ការរស់នៅ​របស់​ប្រជាជន និង​ការអភិវឌ្ឍ​សង្គម និង​សេដ្ឋកិច្ច​។​

​លោក​បាន​និយាយថា​៖ «​រាជរដ្ឋាភិបាល​នឹង​បន្ត​ចាត់វិធានការ​ទាំងអស់​ដែល​អាចធ្វើ​ទៅបាន​ដើម្បី​សម្រេច​គោលដៅ​របស់ខ្លួន​»​។​

​អាជ្ញាធរ​ជាតិ​ប្រយុទ្ធ​នឹង​ជំងឺអេដស៍​បាន​អះអាងថា​គោលដៅ​របស់​ប្រទេស​កម្ពុជា​គឺ​មិនមាន​ការឆ្លង​មេរោគ​អេដស៍​ថ្មី​លើសពី​មួយ​ក្នុង​មួយថ្ងៃ​និង​មិនមាន​មនុស្ស​ស្លាប់​ច្រើនជាង​បីនាក់​ក្នុង​មួយថ្ងៃ​ដោយសារ​ជំងឺ​នេះ​។​

​កម្មវិធី​រួមគ្នា​របស់​អង្គការសហប្រជាជាតិ​ស្តីពី​មេរោគ​អេដស៍​/​ជំងឺអេដស៍ (UNAIDS) បានកំណត់​គោលដៅ ៩០-៩០-៩០ ថា​នៅ​ឆ្នាំ ២០២០ ៩០ ភាគរយ​នៃ​អ្នក​ផ្ទុកមេរោគ​អេដស៍​នឹង​ដឹង​ពី​ស្ថានភាព​មេរោគ​អេដស៍​របស់​ពួកគេ ៩០ ភាគរយ​នៃ​មនុស្ស​ទាំងអស់​ដែល​បានធ្វើ​រោគវិនិច្ឆ័យ​ថា​មាន​ផ្ទុកមេរោគ​អេដស៍​និង​ទទួល​ការព្យាបាល​ដោយ​ថ្នាំ​ប្រឆាំងនឹង​មេរោគ​ដោយ​និរន្តរភាព​ហើយ ៩០ ភាគរយ​នៃ​មនុស្ស​ទាំងអស់​ដែល​ទទួល​ការព្យាបាល​ដោយ​ថ្នាំ​ប្រឆាំង​វីរុស​នឹងមាន​ការបង្ក្រាប​វីរុស​។​

​រហូតមកដល់​ពេលនេះ​ប្រទេស​កម្ពុជា​សម្រេចបាន​គោលដៅ ៩០-៩០-៩០ ហើយ​កំពុង​ឈានដល់​គោលដៅ ៩៥-៩៥-៩៥ ប៉ុន្តែ​លោក ហ៊ុន សែន បាន​និយាយថា​កុំ​មាន​មោទនភាព​ចំពោះ​រឿងនេះ​ឆាប់​ពេក​។​

​លោក​បាន​បន្ថែមថា​៖ «​យើង​មិនត្រូវ​ភ្លេច​និង​ពេញចិត្ត​ចំពោះ​សមិទ្ធិផល​របស់​យើង​ទេ ពីព្រោះ​ចាប់តាំងពី​ការរីក​រាលដាល​នៃ​មេរោគ​អេដស៍​ក្នុង​ទសវត្ស​ឆ្នាំ ១៩៨០ ពិភពលោក​មិនទាន់បាន​រកឃើញ​វ៉ាក់សាំង​ឬ​ថ្នាំ​ដើម្បី​ព្យាបាល​ជំងឺអេដស៍​នៅឡើយ​ទេ​»​។​

​លោក​បាន​បន្តថា​៖ «​មាន​អ្នក​ផ្ទុកមេរោគ​អេដស៍​ប្រមាណ ១២ ០០០ នាក់​ដែល​មិនទាន់បាន​វិលត្រឡប់​មក​ពិនិត្យ​ឈាម​ដើម្បី​ពិនិត្យ​ស្ថានភាព​មេរោគ​អេដស៍​របស់​ពួកគេ​ឡើងវិញ​ទេ ហើយ​អ្នក​ជំងឺអេដស៍​មួយចំនួន​បានសម្រេច​ចិត្ត​បោះបង់​ការព្យាបាល​រៀងៗ​ខ្លួន​។ ក្រុមខ្លះ​រួមទាំង​អ្នក​បម្រើសេវា​កំសាន្ត អ្នកញៀន​គ្រឿងញៀន បុរស​ដែល​រួមភេទ​ជាមួយ​បុរស និង​អ្នក​កែរ​ភេទ​នៅតែ​ងាយ​នឹង​ឆ្លង​។​

​កាលពី​ថ្ងៃ​សុក្រ​សប្តាហ៍​មុន អាជ្ញាធរ​ជាតិ​ប្រយុទ្ធ​នឹង​ជំងឺអេដស៍​បានចេញ​ផ្សាយ​របាយការណ៍​ឆ្នាំ ២០១៩ របស់ខ្លួន​ដោយ​បញ្ជាក់ថា​មនុស្ស​សរុប ១ ៣០០ នាក់​បាន​ស្លាប់​ដោយសារ​ជំងឺ​នេះ​នៅក្នុង​ប្រទេស​កម្ពុជា​កាល​ពី​ឆ្នាំមុន​។​

​យោងតាម​របាយការណ៍​នេះ មនុស្ស​សរុប​ចំនួន ៧៣ ០០០ នាក់​កំពុង​រស់នៅ​ជាមួយ​មេរោគ​អេដស៍​នៅក្នុង​ប្រទេស​កម្ពុជា​កាល​ពី​ឆ្នាំមុន​និង ៦១ ១៩៣ នាក់​បានទទួល​ការព្យាបាល​ដោយ​ថ្នាំ​ប្រឆាំងនឹង​មេរោគ​អេដស៍​។​

​របាយការណ៍​បាន​និយាយថា អត្រា​ប្រេ​វ៉ាឡង់​នៃ​មនុស្ស​ដែលមាន​អាយុ​ចន្លោះ​ពី ១៥ ទៅ ៤៩ ឆ្នាំ​គឺមាន ០,៥ ភាគរយ​ហើយ​មាន​ករណី​ថ្មី​ចំនួន ៧៨០ ករណី​នៅក្នុង​ក្រុម​អាយុ​នេះ​កាលពី​ឆ្នាំមុន​។​

​របាយការណ៍​បន្តថា អត្រា​អ្នក​ផ្ទុកមេរោគ​អេដស៍​ក្នុងចំណោម​អ្នក​បម្រើសេវា​កំសាន្ត​គឺ ៣,២ ភាគរយ​អ្នក​ប្រើ​គ្រឿងញៀន ៥,៧ ភាគរយ​អ្នក​ចាក់​គ្រឿងញៀន ១៥,២ ភាគរយ​បុរស​រួមភេទ​ជាមួយ​បុរស ៤ ភាគរយ​និង​អ្នក​ប្តូរ​ភេទ​មាន ៩,៦ ភាគរយ​។​

​លោក ឈឹម ឃិន​ដា​រ៉េត អគ្គលេខាធិការ នៃ​អាជ្ញាធរ​ជាតិ​ប្រយុទ្ធ​នឹង​ជំងឺអេដស៍​បាន​ប្រាប់​កាសែត​ខ្មែរ​ថា​ម​ស៍​ថា ប្រទេស​កម្ពុជា​កំពុង​ស្ថិតនៅ​លើផ្លូវ​វិជ្ជមាន​ប្រឆាំងនឹង​ជំងឺអេដស៍​ប៉ុន្តែ​នៅតែមាន​ការងារ​ត្រូវធ្វើ​។​

​ទិវា​ពិភពលោក​ប្រយុទ្ធ​ប្រឆាំងនឹង​ជំងឺអេដស៍​ត្រូវបាន​ប្រារព្ធ​ឡើង​ដំបូង​ក្នុង​ឆ្នាំ ១៩៨៨​។ ជា​រៀងរាល់ឆ្នាំ​អង្គការ​និង​បុគ្គល​ទូទាំង​ពិភពលោក​យកចិត្តទុកដាក់​លើ​ការរីក​រាលដាល​នៃ​មេរោគ​អេដស៍ ការខិតខំ​បង្កើន​ការយល់ដឹង​និង​ចំណេះដឹង​អំពី​មេរោគ​អេដស៍ ការនិយាយ​ប្រឆាំងនឹង​ការ​មាក់ងាយ​មេរោគ​អេដស៍​និង​អំពាវនាវ​ឲ្យ​មានការ​ឆ្លើយតប​កើនឡើង​ដើម្បី​ឆ្ពោះទៅរក​ការបញ្ចប់​ការ​រាតត្បាត​នៃ​មេរោគ​​អេដស៍​៕

​ប្រែ​សម្រួល​ដោយ សៀវ គួ​យ​អ៊ី​

Related Posts

Previous Article

ការ​រំលូត​កូន​មាន​ការ​កើន​ឡើង​នៅ​កម្ពុជា ខណៈ​សម្ពាធ​សង្គម​មានការ​ថយចុះ​

Next Article

សិស្ស​ថ្នាក់​ទី ៩ សម្ដែង​ការ​ព្រួយ​បារម្ភ​អំពី​លទ្ធផល​ប្រឡង​