សាលាដំបូងខេត្តរតនគិរីបានទម្លាក់ការចោទប្រកាន់លើអតីតអ្នកកាសែតខេមបូឌាដេលីចំនួន ២ នាក់បន្ទាប់ពីដើមចោទបានសម្រេចដកពាក្យបណ្តឹង។

 

លោក សេក សោភ័ណ្ឌ ជាមេធាវីរបស់ពួកគេបាននិយាយថាតុលាការបានទម្លាក់ការចោទប្រកាន់
ដោយពិចារណាលើចម្លើយរបស់ដើមបណ្តឹងនិងកូនក្តីរបស់លោកក្នុងអំឡុងពេលនៃការកាត់ទោស។

លោកបានរៀបរាប់ថា សាលក្រមមានភាពយុត្តិធម៌សម្រាប់កូនក្តីលោកដោយនិយាយថា៖ «អង្គជំនុំជម្រះសាលាដំបូងបានសំរេចថាលោក Zsombor Peter និងលោក អូន ភាពត្រូវបានលើកលែងទោសនិងទទួលបានយុត្តិធម៌»។

លោកបានលើកឡើងថា សាលាដំបូងខេត្តរតនគិរីបានធ្វើការសំរេចចិត្តនេះបន្ទាប់ពីដើមចោទឈ្មោះ ​រម៉ាំ យ៉ូត សំរេចដកពាក្យបណ្តឹង។ លោកបន្តថាលោក ​រម៉ាំ យ៉ូត ​ជាអតីត​មេឃុំ​ប៉ាតេ​ មក​ពី​គណបក្ស​ សម រង្ស៊ី ចន្លោះឆ្នាំ ២០១២ និង ២០១៧ ។

លោក អូន ភាព បាននិយាយថា៖ «ខ្ញុំគិតថាការទម្លាក់ការចោទប្រកាន់គឺផ្តល់យុត្តិធម៌ដល់ខ្ញុំ ហើយខ្ញុំពិតជារីករាយណាស់។

កន្លងមកសាលាដំបូងខេត្តរតនគិរីបានចោទប្រកាន់លោក ភាព ជាជនជាតិខ្មែរនិងលោក Zsombor ជនជាតិកាណាដាពីបទ ញុះញង់អោយប្រព្រឹត្តបទឧក្រិដ្ឋ។

ការចោទប្រកាន់នេះធ្វើឡើងបន្ទាប់ពីអ្នកកាសែតទាំងពីរនាក់នេះសម្ភាសពលរដ្ឋនៅឃុំប៉ាតេ ស្រុកអូរយ៉ាដាវនៅខែសីហាឆ្នាំ ២០១៧ ពាក់ព័ន្ធនឹងការបោះឆ្នោតជ្រើសរើសក្រុមប្រឹក្សាឃុំ​ សង្កាត់៕

ប្រែសម្រួលដោយ សៀវ គួយអ៊ី