cellcard cellcard cellcard

វិស័យ​ហិរញ្ញវត្ថុ​របស់​កម្ពុជា ជួយ​ដល់​ជន​ទីទ័ល​នៅក្នុង​ប្រទេស​

Khmer Times Share:
​បុគ្គលិក​គ្រឹះស្ថាន​មីក្រូហិរញ្ញវត្ថុ​ម្នាក់​ជួប​ជាមួយនឹង​កសិករ​ម្នាក់​។ សហការី​

ស្រប​ពេលដែល​ប្រជាពលរដ្ឋ​កម្ពុជា​បន្ត​ជួបប្រទះ​នឹង​បញ្ហា​ប្រឈម​ដែល​កើតចេញពី​ជំងឺ​កូ​វីដ​-១៩ និង​ការបំផ្លិចបំផ្លាញ​ដោយសារ ទឹកជំនន់​នៅ​ទូទាំងប្រទេស​កាលពីពេល​ថ្មីៗ គ្រឹះស្ថាន​ហិរញ្ញវត្ថុ និង​ធនាគារ (BFIs) នៅ​កម្ពុជា​កំពុង​ជួយ​ដល់​ប្រជាពលរដ្ឋ​ទាំងនោះ​ក្នុង​គ្រា​លំបាក​។

​ចាប់តាំងពី​ដើមឆ្នាំ ២០២០ គ្រឹះស្ថាន​ហិរញ្ញវត្ថុ និង​ធនាគារ​របស់​កម្ពុជា បាន​រៃអង្គាស មូលនិធិ​ជាង ៥០ ម៉ឺន​ដុល្លារ ដើម្បី​បរិច្ចាគ​ដល់​វិស័​សុខាភិបាល រួមទាំង​សម្ភារៈ​សុខាភិបាល និង​គ្រឿង​ឧបភោគបរិភោគ សម្រាប់​ឧបត្ថម្ភ​ដល់​សហគមន៍​ដែល​ងាយ​រងគ្រោះ​។

​បណ្ឌិត អ៊ិន ចាន់នី ប្រធាន​សមាគម​ធនាគារ​នៅ​កម្ពុជា (ABC) មានប្រសាសន៍ថា​៖ “​វិស័យ ធនាគារ និង​ហិរញ្ញវត្ថុ គឺជា ‘​អាជីវកម្ម​ជាមួយ​មនុស្ស​’ ដែល​កើតចេញពី​បេះដូង ហើយ​ត្រូវបាន​ជំរុញ​ដោយ​សេចក្ដីប្រាថ្នា​ចង់​ជួយ​មនុស្ស​ឲ្យ​ជោគជ័យ និង​រីកចម្រើន​តាមរយៈ​សេវា ហិរញ្ញវត្ថុ​ផ្លូវការ​។ សេចក្ដីប្រាថ្នា​នេះ ក៏ត្រូវ​បាន​ពង្រីក​ជួយ​ដល់​ប្រជាជន​ទីទ័ល តាម​មធ្យោបាយ​ដែល​យើង​អាចជួយ​បាន​”​។​

​យោងតាម​ការអង្កេត​ថ្មីៗ​ដែល​រៀបចំ​ដោយ​សមាគម​បាន​បង្ហាញថា គ្រឹះស្ថាន​ធនាគារ និង​ហិរញ្ញវត្ថុ​ជាង​ពាក់កណ្ដាល​នៅ​កម្ពុជា បាន​បញ្ចូល​កម្មវិធី​សង្គម​ទៅក្នុង​បេសកម្ម​ស្នូល​របស់ខ្លួន ដោយ​ក្នុងនោះ​មាន​គ្រឹះស្ថាន​មួយចំនួន​ប្ដេជ្ញា​បរិច្ចាក ប្រាក់ចំណូល​ក្នុង​កម្រិត​ភាគរយ​ណាមួយ​ដើម្បី​គាំទ្រ​ដល់​បុព្វហេតុ​សង្គម​ទាក់ទង​នឹង​បរិស្ថាន អប់រំ សុខាភិបាល និង​បរិ​យា​ប័ន្ន​ហិរញ្ញវត្ថុ​។

​លោក គា បូរាណ ប្រធាន​សមាគម​គ្រឹះស្ថាន​មីក្រូហិរញ្ញវត្ថុ​កម្ពុជា (CMA) បាន​ពន្យល់ថា​៖ “​គ្រឹះស្ថាន​មីក្រូហិរញ្ញវត្ថុ មាន​តួនាទី​ពិសេស​នៅក្នុង​សង្គម​កម្ពុជា​ក្រោយ​សម័យ​សង្គ្រាម ហើយ​សមាជិក​របស់​យើង​ភាគច្រើន​បាន​បញ្ចូល​កម្មវិធី​សង្គម ទៅក្នុង​ប្រតិបត្តិការ​ស្នូល​របស់ខ្លួន​។

​លោក​បាន​បន្តទៀតថា​៖ “​ប៉ុន្តែ​កិច្ចការ​ទាំងនេះ គឺ​លើសពី​ការបរិច្ចាគ​មនុស្សធម៌ ឬ​ការងារ​ស្ម័គ្រចិត្ត​ទៅទៀត បើទោះបីជា​ការងារ​ទាំង​អស់នេះ​សុទ្ធ​តែមាន​សារៈសំខាន់​ក្ដី ហើយ​កម្មវិធី​សង្គម នេះ ជួយ​ឲ្យ​គ្រឹះស្ថាន​មីក្រូហិរញ្ញវត្ថុ​ផ្ដល់​អាទិភាព​លើ​សុខុមាលភាព​របស់​អតិថិជន នៅក្នុង​គ្រប់​ការងារ​របស់ខ្លួន​”​។

​លោក​បន្ថែមថា​៖ “​អំឡុងពេល​ជួបប្រទះ​ជំងឺ​កូ​វីដ​-១៩ យើង​បាន​បង្កើន​កិច្ចខិតខំ​ប្រឹង ប្រែង​ទ្វេ​រដង​ដើម្បី​ជួយ​អតិថិជន ដូចជា​តាមរយៈ​ការរៀបចំ​ប្រាក់​ឥណទាន​ឡើងវិញ​ដល់ អតិថិជន​ចំនួន​ជាង ២៧ ម៉ឺន​នាក់ ក្នុង​ទំហំ​ទឹកប្រាក់​ជាង ៣​ពាន់​លាន​ដុល្លារ ហើយ​យើង​នៅតែ​បន្ត​កិច្ចការងារ​នេះ​ទៅទៀត ខណៈពេលដែល​យើង​កាន់តែ​ឃើញច្បាស់​ពី​ទំហំ​ជំងឺ​កូ​វីដ​-១៩ និង​ផលប៉ះពាល់​នៃ​ជំងឺ​នេះ​មកលើ​សេដ្ឋកិច្ច​”​។

​លោក គា បុរាណ មានប្រសាសន៍​ទៀតថា​៖ “​យើង​ក៏​កំពុងធ្វើការ​ជាមួយនឹង​សមាជិក របស់​សមាគម ដើម្បី​រៀបចំ​ច្បាប់ ដែល​បច្ចុប្បន្ន​កំពុងតែ​ព្រាង​ឡើង ដែល​នឹង​បញ្ចូល លក្ខខណ្ឌ​ការពារ​អតិថិជន​នៅក្នុង​ច្បាប់​របស់​កម្ពុជា ហើយ​នេះ​ជា​កិច្ច​ការដែល​យើង គាំទ្រ​យ៉ាង​ពេញទំហឹង​”​។ ហើយ​លោក​បាន​កត់សម្គាល់ថា គ្រឹះស្ថាន​មីក្រូហិរញ្ញវត្ថុ និង​ធនាគារ​ឈានមុខ​ចំនួន​៩ បានទទួល​វិ​ញ្ញាប​ន​កម្ម​ពី Smart Client Protection Principles ដែលជា​អង្គការ​ពិភពលោក​មួយ ផ្ដល់​វិ​ញ្ញាប​ន​កម្ម​ដល់​គ្រឹះស្ថាន​មីក្រូហិរញ្ញវត្ថុ សម្រាប់​ការប្រកាន់​ខ្ជាប់​ទៅនឹង​គោលការណ៍​ការពារ​អតិថិជន​។

​បន្ថែម​លើ​ការពង្រឹង​ច្បាប់ សមាគម​មី​ទាំងពីរ រួមជាមួយ​ធនាគារជាតិ​នៃ​កម្ពុជា (NBC) កំពុង​បង្កើន​កិច្ចខិតខំ​ប្រឹងប្រែង​ដើម្បី​លើក កម្ពស់​ចំណេះដឹង​ហិរញ្ញវត្ថុ និង​បរិ​យា​ប័ន្ន​ហិរញ្ញវត្ថុ​នៅ​កម្ពុជា តាមរយៈ​យុទ្ធនាការ​ផ្សព្វផ្សាយ​ពី​គន្លឹះ​មូលដ្ឋាន​ទាក់ទង​នឹង​ការខ្ចី និង​ផ្ដល់​ប្រាក់កម្ចី​ប្រកបដោយ​និរន្តរភាព​។​

​យុទ្ធនាការ​នេះ​នឹង​ប្រើប្រាស់​បណ្ដាញ​ព័ត៌មាន​សង្គម​ឌីជីថល និង​ប្រព័ន្ធ​ផ្សព្វផ្សាយ​នានា ក៏ដូចជា​សិក្ខាសាលា​គោលដៅ​សម្រាប់​សហគ្រាស​ធុន​តូច​និង​មធ្យម ស្ត្រី​ជា​សហគ្រិន និង អាជីវកម្ម​ផ្នែក​កសិកម្ម ដើម្បី​លើកកម្ពស់​គុណភាព​នៃ​ការខ្ចីប្រាក់ ក្នុងចំណោម​ប្រជាពលរដ្ឋ​ដែល “​ខ្វះ​សេវា​ធនាគារ​” ។

​បណ្ឌិត អ៊ិន ចាន់នី មានប្រសាសន៍ថា​៖ “​ឧស្សាហកម្ម​របស់​យើង​ស្ថិតក្នុង​ស្ថានភាព ដែលមាន​ការវិវត្ត​ជាប្រចាំ ខណៈដែល​យើង​កំពុង​ប្រឈម​នឹង​បញ្ហា​កើតចេញពី ជំងឺ​រាតត្បាត ក៏ដូចជា ឱកាស​ដែល​កើតចេញពី​កំណើន​ពិពិធ​កម្ម​សេដ្ឋកិច្ច ដោយ​ក្នុងនោះ ការប្រើប្រាស់​ប្រព័ន្ធ ឌីជីថល​កំពុង​ផ្លាស់ប្ដូរ​របៀបរបប​ធ្វើ​អាជីវកម្ម​របស់​មនុស្ស​គ្រប់គ្នា​”​។

​លោក​បាន​បន្ថែមទៀតថា​៖ “​វិស័យ​ហិរញ្ញវត្ថុ​មានការ​ប្ដេជ្ញា​ក្នុងការ​ធានាថា ការវិវត្ត​នេះ នឹង​បន្ត​ទៅមុខ ហើយ​ផ្ដល់​អាទិភាព​លើ​អតិថិជន​របស់​យើង តាមរយៈ​ការពង្រឹង​សេវា​ការពារ និង​ការអប់រំ​ផ្នែក​ហិរញ្ញវត្ថុ​ឲ្យ​ប្រសើរ​ជាង​មុន ដើម្បី​ជួយ​ពួកគាត់​ឲ្យ​មាន​សមត្ថភាព​ទប់ទល់​នឹង​វិបត្តិ​សេដ្ឋកិច្ចពិភពលោក ដែល​បណ្ដាលមកពី​ជំងឺ​កូ​វីដ​-១៩ ”​៕

Related Posts

Previous Article

អាមេរិក​ផ្តល់​ថវិកា​ចំនួន ៦០ ម៉ឺន​ដុល្លារ​បន្ថែមទៀត​ក្នុងការ​ផ្តល់ជំនួយ​សង្គ្រោះ​ទឹកជំនន់​

Next Article

សហគ្រិន​ខ្មែរ​បាន​ចុះ​ហត្ថលេខា​លើ​កិច្ច​ព្រមព្រៀង​ផ្តល់​ហិរញ្ញប្បទាន ជាមួយ​ធុរកិច្ច​បង្កើត​ថ្មី និង​សហគ្រាស​ធុន​តូច និង​មធ្យម​ចំនួន ២៧