cellcard cellcard cellcard

ឪពុកម្តាយ​ស្វាគមន៍​ដោយ​ប្រុង​ប្រយ័ត្ន​ចំពោះ​ការ​បើក​សាលារៀន​ឡើងវិញ​

មឿន ឈានណារិទ្ធ / Khmer Times Share:
​សាលាបឋមសិក្សា​ចាក់អង្រែ​ក្រោម​បាន​បើក​ឡើងវិញ​កាលពី​ម្សិលមិញ​។ KT/ស៊ីវ ចាន់ណា

​ឪពុកម្តាយ​បាន​សម្តែង​ការគាំទ្រ​និង​ភាពភ័យខ្លាច​ចំពោះ​ការឆ្លង​ជំងឺ​កូ​វីដ​-១៩ ខណៈ​សាលារៀន​នៅ​ភ្នំពេញ​បាន​បើក​ដំណើរការ​កាលពី​ម្សិលមិញ​បន្ទាប់ពី​ការបិទ​បណ្តោះអាសន្ន​ដោយសារ​ព្រឹត្តិការណ៍ ៣ វិច្ឆិកា​។​

​អ្នកស្រី សួង គឹម​ហេង អាយុ ៥២ ឆ្នាំ​ជា​អ្នកគ្រប់គ្រង​សណ្ឋាគារ​បាន​និយាយថា លោកស្រី​សប្បាយចិត្ត​ដែល​ក្រសួង​អប់រំ​បានប្រកាស​បើក​សាលារៀន​ឡើងវិញ​។​

​អ្នកស្រី​បាន​បន្តថា​៖ «​ខ្ញុំ​រីករាយ​ដែល​កូនៗ និង​សិស្ស​ដទៃទៀត​អាច​ត្រឡប់​ទៅ​សាលារៀន​វិញ​ឥឡូវនេះ​។ ប៉ុន្តែ​ខ្ញុំ​នៅតែ​បារម្ភ​អំពី​ជំងឺ​កូ​វីដ​-១៩»​។​

​អ្នកស្រី​មានកូន​ប្រុស​ម្នាក់ និង​កូនស្រី​ម្នាក់​ដែល​កំពុង​សិក្សា​នៅ​វិទ្យាល័យ​បាន​និយាយថា​ការសិក្សា​តាម​អ៊ិន​ធរ​ណេ​ត​ដែល​ជំនួស​នៅពេល​សាលារៀន​បិទ​គឺ​មិនមាន​ប្រសិទ្ធភាព​ទេ​។​

​អ្នកស្រី​បាន​និយាយថា​៖ «​ពេលខ្លះ​កូនៗ របស់ខ្ញុំ​លេង​វីដេអូ​ហ្គេម​ដោយ​លួចលាក់​ខណៈពេលដែល​ពួកគេ​គួរតែ​សិក្សា​។ ពួកគេ​ទទួលបាន​ការរំខាន​ដោយ​បរិស្ថាន​នៅផ្ទះ​និង​មាន​ទំនោរ​ចង់​លេង​ជាជាង​សិក្សា​»​។​

​អ្នកស្រី​ថា​គាត់​ជឿជាក់ថា​ជំងឺ​កូ​វីដ​-១៩ នឹងមិន​បង្ក​ការគំរាមកំហែង​ដល់​សិស្ស​និង​គ្រូ​នៅ​សាលា​ហើយ​ថា​វ៉ាក់សាំង​នឹងមាន​នៅក្នុង​ប្រទេស​កម្ពុ​ជានា​ពេល​ឆាប់ៗ​នេះ​។​

​លោក ហេង ហៀ​ង អាយុ ៥៥ ឆ្នាំ​ជា​អ្នករត់ម៉ូតូឌុប​ក៏បាន​យល់ស្រប​លើ​បញ្ហា​នេះដែរ​។​

​គាត់​បាន​និយាយថា​គាត់​មានកូន​ស្រី​ម្នាក់​រៀន​ថ្នាក់​ទី ៨ ហើយ​សង្ឃឹមថា​គាត់​នឹង​ប្រលង​ជាប់​ដើម្បី​ទៅ​រៀន​នៅ​វិទ្យាល័យ​។​

​លោក​បាន​និយាយថា​៖ «​ប្រសិនបើ​កូន​របស់ខ្ញុំ​បន្ត​រៀន​នៅផ្ទះ​ខ្ញុំ​ខ្លាច​ថា​នាង​នឹង​ប្រឡង​មិនជា​ប់​។ វា​ជា​រឿង​ល្អ​ដែល​សាលា​បើក​ជាថ្មី​»​។​

​លោក​បន្តថា​លោក​សង្ឃឹមថា​សាលា​នឹង​អនុវត្តតាម​វិធានការណ៍​ដែល​បានដាក់​ចេញ​ដោយ​ក្រសួងសុខាភិបាល​និង​អប់រំ​ដើម្បី​ធានាថា​សិស្ស​នឹងមាន​សុវត្ថិភាព​ទាំងស្រុង​។​

​លោក​និយាយថា​៖ «​ឪពុកម្តាយ​ក៏​គួរ​រំ​ឮ​កកូនៗ​របស់គាត់​អោយ​លាងដៃ​និង​ពាក់​ម៉ាស​ពេល​ពួកគេ​ទៅ​សាលា​ផងដែរ​»​។​

​លោក អាន សុវណ្ណ អាយុ ៦០ ឆ្នាំ​ជា​បណ្ណារក្ស​បាន​និយាយថា​លោក​គិតថា​គុណភាព​អប់រំ​នៅ​កម្ពុជា​នឹងរង​ផលប៉ះពាល់​ប្រសិនបើ​សាលារៀន​នៅតែ​បិទទ្វារ​។​

​លោក​បន្តថា​៖ «​ប្រទេស​កម្ពុជា​ជា​សមាជិក​អាស៊ាន​។ និស្សិត​កម្ពុជា​នឹងមិន​អាច​ប្រកួតប្រជែង​ជាមួយ​ជនជាតិ​ដទៃ​សម្រាប់​ការងារ​បានទេ​ប្រសិនបើ​ពួកគេ​មិនអាច​ទទួល​ការសិក្សា​បាន​ត្រឹមត្រូវ​»​។​

​ទោះយ៉ាងណា លោក​បន្ថែមថា​ក្រសួង​អប់រំ​គួរតែ​បន្ត​ផ្តល់​អាទិភាព​ដល់​ការការពារ​ការឆ្លង​ជំងឺ​កូ​វីដ​-១៩ ហើយ​និស្សិត​គួរតែ​ការពារ​ខ្លួន​អោយបាន​ត្រឹមត្រូវ​។​

​លោក​ថា​៖ «​ការអប់រំ​គឺ​សំខាន់ ប៉ុន្តែ​សុខភាព​គឺ​សំខាន់​ជាង​»​។​

​អ្នកស្រី ទុំ ឈី​តា អាយុ ៤៥ ឆ្នាំ​ជា​អ្នកសារព័ត៌មាន​ជំនាញ​ឯកទេស​ខាង​ផ្នែក​សុខភាព​និង​អនាម័យ​រាយការណ៍​ថា​អ្នកស្រី​បារម្ភ​ខ្លាច​និស្សិត​ក្មេងៗ​មិនអាច​អនុវត្តតាម​នីតិវិធី​អនាម័យ​នៅតាម​សាលារៀន​បាន​។​

​អ្នកស្រី​និយាយថា​៖ «​ខ្ញុំ​មិន​គិតថា​ក្មួយប្រុស និង​ក្មួយ​ស្រី​របស់ខ្ញុំ​អាច​សម្អាត​ដៃ​របស់​ពួកគេ​អោយបាន​ត្រឹមត្រូវ​និង​ពាក់​ម៉ាស់​នៅពេល​ពួកគេ​ទៅ​សាលារៀន​នោះទេ​។ ដូច្នេះ​ខ្ញុំ​សង្ឃឹមថា​គ្រូ​នឹង​ជួយ​ពួកគេ​»​។​

​អ្នកស្រី​បន្តថា​វា​គួរអោយ​អស់សំណើច​ណាស់​ដែល​សាលារៀន​ត្រូវបាន​បិទ​ហើយ​បន្ទាប់មក​បាន​បើក​ម្តងទៀត​ដោយសារតែ​ជំងឺ​កូ​វីដ​-១៩​។​

​អ្នកស្រី​ថា​៖ «​វា​ហាក់បីដូចជា​ជំងឺ​កូ​វីដ​-១៩ កំពុង​លេងបិទពួន​ជាមួយនិង​មនុស្ស​អីចឹង​។ ទោះយ៉ាងណា​មនុស្ស​នឹង​អាច​ចាប់​និង​សម្លាប់​វា​បាន​ឆាប់ៗ​នេះ​»​។​

​ដើម្បី​ទប់ស្កាត់​ការរីក​រាលដាល​នៃ​ជំងឺ​កូ​វីដ​-១៩​។ ក្រសួងសុខាភិបាល​និង​អង្គការ​សុខភាព​ពិភពលោក​បានចេញ​សេចក្តីណែនាំ រស់នៅ​ជាធម្មតា​ជាមួយនឹង​របៀប​រស់នៅ​បៃ​ប​ថ្មី សម្រាប់​ប្រជាជន​កម្ពុជា​។ ការណែនាំ​រំ​ឮ​កម​នុស្ស​អោយធ្វើតាម​ការអនុវត្ត​ទាំងនេះ​គឺ លាងដៃ​របស់​អ្នក​អោយបាន​ញឹកញាប់ ខ្ទប់​ច្រមុះ​និង​មាត់​របស់​អ្នក​នៅពេល​អ្នក​ក្អក ឬ​កណ្តាស់​។ ជៀសវាង​ការ​ប៉ះ​មុខ​របស់​អ្នក​ដោយ​ដៃ​របស់​

​អ្នក កាត់បន្ថយ​ការ​ទៅ​កន្លែង និង​ស្នាក់នៅ​កន្លែង​ដែលមាន​មនុស្ស​ច្រើន​។ រក្សា​គម្លាត​យ៉ាងហោចណាស់ ១,៥ ម៉ែត្រ​ពី​អ្នកដទៃ​។ សម្អាត​វត្ថុ​ទាំងអស់​ដែល​អ្នក​ប៉ះ​ជា​ញឹកញាប់​ជាមួយ​សាប៊ូ និង​អាល់កុល​។ នៅ​អោយ​ឆ្ងាយ​ពី​អ្នកដទៃ​ប្រសិនបើ​អ្នកមាន​អារម្មណ៍​ថា​ឈឺ​ហើយ​ទទួលយក​ការព្យាបាល​ប្រសិនបើ​ចាំបាច់​៕

​ប្រែ​សម្រួល​ដោយ សៀវ គួ​យ​អ៊ី​

Related Posts

Previous Article

រដ្ឋាភិបាល​ក្រុង​ប៉េកាំង​ប្តេជ្ញា​ចូល​រូ​ម​កិច្ចព្រមព្រៀង​ពាណិជ្ជកម្ម​ដែល​លោក​ដូ​ណា​ល់ ត្រាំ បោះបង់​

Next Article

ផ្ទះ​ចំនួន ១៣០ ខ្នង​រង​ការ​ខូច​ខាត​ដោយ​សារ​ព្យុះ​នៅ​ក្នុង​ខេត្ត​កំពង់ស្ពឺ​