cellcard cellcard

ផ្ទុះគ្រាប់ ៧៤ មីលីម៉ែត្រ របួសពីរនាក់នៅប៉ៃលិន

ប៉ិច សុធារី / Khmer Times Share:
Faceboo/Heng Ratana

ប៉ៃលិន៖ បុរស​ពីនាក់ បានរងរបួសធ្ងន់ នៅក្នុងហេតុការណ៍ផ្ទុះគ្រាប់​មិនទាន់​ផ្ទុះ​ប្រភេទ ៧៤មីលីម៉ែត្រ នៅ​ចំណុច​ភូមិ​បរ​ហ៊ុយ​ត្បូង សង្កាត់បរយ៉ាខា ក្រុងប៉ៃ​លិន ខេត្តបៃ​លិន។

អធិការ​រង​នគ​​របាលក្រុងប៉ៃលិន លោកវរសេនីយ៍ទោ គង់ សំណាង បានឲ្យ​ដឹង​កាលពីថ្ងៃ​ព្រហស្បត្តិ៍ថា ហេតុការណ៍​ផ្ទុះ​គ្រាប់យុទ្ធភ័ណ្ឌមិនទាន់ផ្ទុះ​នេះ បានកើតឡើងកាលពីម៉ោងជិត​៥ល្ងាច ថ្ងៃ​ពុធ បានបណ្តាលឲ្យបុរស​ពីរ​នាក់ មាន​ឈ្មោះ​ ណារ៉ុន តេត្រា អាយុ​៣៤​ឆ្នាំ មានទីលំនៅនៅខេត្តបាត់ដំបង ​និងឈ្មោះ ​វង់ សំណាង អាយុ ៤៥​ឆ្នាំ មាន​ទី​លំ​នៅ​​នៅខេត្តប៉ៃ​លិន បានរង​របួស​​ធ្ងន់ ​និងត្រូវបានបញ្ជូនទៅ​សង្គ្រោះ​​​នៅមន្ទីរ​ពេទ្យ​បង្អែកខេត្ត។

លោកថា៖ «ជន​រង​គ្រោះទាំង​ពីរនាក់នេះ ជា​កម្មករ​ បានបើក​ត្រាក់ទ័រឈូសឆាយដី​ដើម្បីរៀបចំ
ជាទីតាំងលក់ដូរ​ ហើយ​ក៏ប៉ះ​ចំគ្រាប់បណ្តាលឲ្យផ្ទុះតែម្តង ពួកគេ​បានរងរបួស​ត្រូវចំខ្លួន និងជើង ប៉ុន្តែ​ពុំ​បង្កឲ្យធ្លាក់ខ្លួនពិការនោះទេ»។

បើតាម លោក គង់ សំណាង ក្រោយហេតុការណ៍នោះ សមត្ថកិច្ចក៏បាន​​រកឃើញគ្រាប់ប្រភេទ ៧៤មីលីម៉ែត្រ មួយ​គ្រាប់​ទៀត​ នៅកន្លែងកើតហេតុផង​ដែរ ហើយបច្ចុប្បន្ន ត្រូវបាន​យកមន្ត្រីជំនាញ​ដោះបន្សាប​ដោយ​សុវត្ថិ​ភាព​ហើយ។

កាល​ពីសប្តាហ៍មុន ក៏មានបុរស​ម្នាក់ឈ្មោះ ពុធ វ៉ាន់​ អាយុ៥៣​ឆ្នាំ រស់នៅឃុំតាតោក ស្រុក​សំឡូត ខេត្ត​​បាត់ដំបង បាន​ជួប​ឧប្បត្តិហេតុគ្រោះថ្នាក់ដោយផ្ទុះមីន បណ្តាល​ឲ្យរង​របួស​ដាច់ជើង​ស្តាំ ក្នុងពេលដែលជន​រង​គ្រោះ​​បាន​ដើរ​​មើល​អន្ទាក់ដាក់សត្វ​នៅក្នុង​ព្រៃនៅក្បែរភូមិ។

យោងតាមរបាយការណ៍​របស់អាជ្ញាធរមីន បាន​ឲ្យដឹងថា រយៈ​ពេល​៤​ខែដើមឆ្នាំនេះ មានមនុស្សចំនួន៥នាក់ បាន​ស្លាប់ និង ២១​នាក់ បានរង​របួស​ធ្ងន់​និងស្រាល ​ដោយសារ​គ្រាប់មីន និងគ្រាប់យុទ្ធ​ភណ្ឌមិនទាន់​ផ្ទុះ។ តួ​លេខ​នេះ​មានការថយចុះប្រមាណ ៤៨ភាគរយ បើធៀបនឹង​រយៈ​ពេលដូចគ្នា​​កាលពីឆ្នាំ​មុន ដែលមានអ្នកស្លាប់និងរបួស​រហូត​ដល់៥០នាក់។​

របាយការណ៍បានបន្តថា ក្នុងកំឡុងពេល៤ខែនេះ​ដែរ ប្រតិបត្តិករ​បោសសំអាតមីន​ទូទាំង​ប្រទេស​ ក៏បានបោសសំអាត​មីន​លើផ្ទៃដី ៣៦,១៨០,៧០៤ម៉ែត្រ​ក្រឡា ដោយរកឃើញមីនប្រឆាំងមនុស្ស​ចំនួន ៤៨៩៣​គ្រាប់ មីន​ប្រឆាំង​រថ​ក្រោះ ១២០​គ្រាប់ និង​សំណល់​​ជាតិ​ផ្ទុះ​ពី​សង្គ្រាម​ ១៤១៩៥​​គ្រាប់​។

ពាក់ព័ន្ធនឹងករណីនេះ អាជ្ញាធរមីន បានអំពាវនាវដល់ប្រជាពលរដ្ឋទាំង​អស់ ត្រូវមានការប្រុងប្រយ័ត្ន និងជៀស​វាង​​ប៉ះ​ពាល់​​ ឬដំ គប់​លេង ឬកែ​​ច្នៃ​គ្រាប់យុត្ធភ័ណ្ឌមិនទាន់​​ផ្ទុះទាំងនោះ ព្រោះ​វា​អាចបណ្តាល​ឲ្យ​ផ្ទុះ​​ស្លាប់ និងរបួស ឬអាច​ធ្លាក់​​ខ្លួន​​ពិការ ហើយត្រូវ​​រាយការណ៍ទៅអាជ្ញាធរ​មូលដ្ឋានឬ​​ប្រតិបត្តិ​ករបោស​សំអាតមីន​ដែលនៅជិត​ទីនោះ ដើម្បី​យក​គ្រាប់ទាំងនោះទៅកម្ទេ​ចោល៕

Previous Article

អគ្គ​នាយក​ដ្ឋាន​ពន្ធដារ​កោះ​ហៅ​ក្រុម​ហ៊ុន​ចំនួន ៤ ដើម្បី​ទូទាត់​បំណុល​ពន្ធ​

Next Article

អាណាព្យាបាលសិស្សគ្រោងដាក់ញត្តិទៅនាយករដ្ឋមន្រ្តីសុំជួយអន្តរាគមន៍បញ្ចុះតម្លៃសិក្សា តាមអនឡាញ៣៥%