បន្ទាប់ពីគ្មានករណីថ្មី ៣៨ ថ្ងៃ កម្ពុជារកឃើញអ្នកឆ្លងជំងឺកូវីដ១៩ ម្នាក់

May 22, 2020

បន្ទាប់ពីគ្មានករណីថ្មី ៣៨ ថ្ងៃ កម្ពុជារកឃើញអ្នកឆ្លងជំងឺកូវីដ១៩ ម្នាក់

Khmer Times No Comments

ដំណើរដ៏រឹងមាំរបស់ប្រទេសកម្ពុជារយៈពេល ៣៨ ថ្ងៃជាប់ៗគ្នាដោយគ្មានករណីវិជ្ជមានថ្មីណាមួយនៃជំងឺកូវីដ១៩ ត្រូវបានបញ្ចប់ កាលពីថ្ងៃព្រហស្បតិ៍នៅពេលដែលករណីវិជ្ជមានទី ១២៣ ត្រូវបានរកឃើញដោយក្រសួងសុខាភិបាល។

នេះជាករណីថ្មីដែលត្រូវបានបញ្ជាក់បន្ទាប់ពីមិនមានករណីថ្មី ជាងប្រាំសប្តាហ៍កន្លងមក។

ករណីឆ្លងថ្មីត្រូវបានរកឃើញលើបុរសជនជាតិខ្មែរអាយុ ២៦ ឆ្នាំរស់នៅស្រុកកំពង់ត្រឡាច ខេត្តកំពត។ រូបគេបានមកដល់ប្រទេសកម្ពុជានៅថ្ងៃទី ២០ ខែឧសភា តាមជើងយន្តហោះមកប្រទេសហ្វីលីពីន តាមរយៈសាធារណរដ្ឋកូរ៉េ។ ឥឡូវអ្នកជំងឺរូបនេះត្រូវបានគេបញ្ជូនទៅមន្ទីរពេទ្យមិត្តភាពខ្មែរ – សូវៀតដើម្បីទទួលព្យាបាល។

អ្នកដំណើរ ៦២ នាក់ផ្សេងទៀតដែលស្ថិតជើងហោះហើរតែមួយរួមមាន ជនជាតិកូរ៉េ ២៣ នាក់ ជនជាតិបែលហ្ស៊ិក ម្នាក់ អ្នកកោះតៃវ៉ាន់ម្នាក់ ជនជាតិហូឡង់ម្នាក់ ជនជាតិជប៉ុន ៣ នាក់និងជនជាតិខ្មែរ ៣៣ នាក់ ត្រូវបានដាក់ឱ្យស្ថិតក្នុងចត្តាឡីស័ករយៈពេល ១៤ ថ្ងៃនៅសណ្ឋាគារមួយក្នុងរាជធានីភ្នំពេញ។

ជាមួយនឹងករណីថ្មី ចំនួនករណីសរុបដែលបានបញ្ជាក់នៅក្នុងព្រះរាជាណាចក្របានកើនឡើងដល់ ១២៣ នាក់ក្នុងនោះមាន ជនជាតិខ្មែរ ៥២ នាក់ បារាំង ៤០ នាក់ ម៉ាឡេស៊ី ១៣ នាក់ អង់គ្លេស ៥ នាក់ ចិន ៣ នាក់ វៀតណាម ៣ នាក់ អាមេរិក ២ នាក់ ឥណ្ឌូណេស៊ី ២ នាក់ កាណាដា ២ នាក់ និងបែលហ្ស៊ិកម្នាក់។ ក្នុងនោះ ១២២ នាក់ត្រូវបានព្យាបាលជាសះស្បើយ។

ចាប់តាំងពីករណីដំបូងត្រូវបានគេរកឃើញនៅខេត្តព្រះសីហនុកាលពីចុងខែមករា ជំងឺរាតត្បាតកូវីដ១៩ បានរាលដាលដល់ខេត្តចំនួន ១៣ និងរាជធានីនៃប្រទេសកម្ពុជា។

ក្រសួងមិនបានបង្ហាញកន្លែងដែលអ្នកដំណើរដែលបានរួមជើងយន្តហោះជាមួយអ្នកជំងឺថ្មីត្រូវបានគេដាក់ឱ្យនៅដាច់ពីគ និងកាលៈទេសៈដែលអ្នកជំងឺរូបនេះអាចបានឆ្លងមេរោគដ៏សាហាវនេះដែរ៕