​កាលពី​ម្សិលមិញ​តុលាការក្រុង​ភ្នំពេញ​បាន​ចោទប្រកាន់​បុរស​ម្នាក់​ពី​បទ​ផ្សាយ​ព័ត៌មាន​មិន​ពិត​ ​ពី​ថ្នាក់ដឹកនាំ​រដ្ឋាភិបាល​​នៅ​លើ​គណនី​ ​YouTube​ ​របស់​គាត់​ ​ឈ្មោះ​”​Daily​ ​Hot​ ​News​”​ ​ដើម្បី​ទាក់ទាញ​ឲ្យ​មាន​អ្នក​ចូល​ទស្សនា​ច្រើន​ ហើយនឹង​ទទួល​បាន​ប្រាក់ចំណូល​ពី​ក្រុមហ៊ុន​ ​Google​ ​Inc​.​
​
​ឯកសារ​មួយ​របស់​តុលាការ​បាន​កំណត់​អត្តសញ្ញាណ​ជនជាប់ចោទ​ថា​ ​ឈ្មោះ​ ​វឿន​ ​គឹ​មលន់​ ​អាយុ​ ​២៤​ ​ឆ្នាំ​ជា​កសិករ​ម្នាក់​រស់នៅ​ស្រុក​ក្រគរ​ ​ខេត្តពោធិ៍សាត់​។​
​
​លោក​ ​គឹ​មលន់​ ​ត្រូវ​បាន​គេ​ចោទប្រកាន់​ពី​បទ​ញុះញង់​ឱ្យ​ប្រព្រឹត្ត​បទឧក្រិដ្ឋ ​និង​ប្រឈមមុខនឹង​ការ​ជាប់ពន្ធនាគារ​រហូតដល់​ពីរ​ឆ្នាំ​ ​និង​ពិន័យ​ជា​ប្រាក់​ចន្លោះ​ពី​ ​២៥០​ ​ដុល្លារ​ ​១,000​ ​ដុល្លារ​ ​ប្រសិនបើ​ត្រូវ​បាន​ផ្តន្ទា​ទោស​។​
​
​លោក​គឹ​មលន់​ ​ត្រូវ​បាន​ចាប់ខ្លួន​កាលពី​ថ្ងៃ​ព្រហស្បតិ៍​នៅ​ខេត្ត​បន្ទាយមានជ័យ​ ​ដោយ​នគរបាល​ប្រឆាំង​នឹង​ឧក្រិដ្ឋ​កម្ម​តាម​ប្រព័ន្ធ​អ៊ីនធឺណិត ​ពី​​ក្រសួងមហាផ្ទៃ​សហការ​ជាមួយ​នគរបាល​សន្តិសុខ​ផ្ទៃក្នុង​ខេត្ត​។​ ​បច្ចុប្បន្ន​ លោក ​គឹ​មលន់​ ​កំពុង​ស្ថិតនៅ​ក្នុង​ពន្ធនាគារ​រង់ចាំ​ការ​ជំនុំជម្រះ​។​
​
​លោក​ ​លី​ ​ណា​រិន​ ​មន្ត្រី​ប៉ូលិស​នៃ​នាយកដ្ឋាន​ប្រឆាំង​នឹង​ឧក្រិដ្ឋ​កម្ម​តាម​ប្រព័ន្ធ​អ៊ីនធឺណិត​បាន​និយាយ​កាលពី​ថ្ងៃ​ចន្ទ​ថា​ ​យោង​តាម​ការស៊ើបអង្កេត​ ជនជាប់ចោទ​កាលពី​ខែមីនា​ឆ្នាំមុន​ គាត់បាន​ចាប់ផ្តើម​ប្រើ​គណនី​ ​YouTube​ ​ដែល​មានឈ្មោះ​ថា​ ​”​Daily​ ​Hot​ ​News​”​ ​ផ្សព្វផ្សាយ​វីដេអូ​ទាក់ទាញ​អ្នកទស្សនា​ដើម្បី​រក​ប្រាក់ចំណូល​។​
​
​លោក​ ​គឹ​មលន់​ ​បាន​ផលិត​ ​និង​ចាក់​ផ្សាយ​ព័ត៌មាន​មិន​ពិត​ពី​ លោកនាយក​រដ្ឋមន្រ្តី​ ​ហ៊ុន​ ​សែន​ ​និង​ ​លោក​ ​ស​ ​ខេង​ ​រដ្ឋមន្រ្តី​ក្រសួងមហាផ្ទៃ​។​ ដោយបាន​ផ្សព្វផ្សាយ​ថា​ នាយក​រដ្ឋមន្ត្រី​ស្លាប់​ដោយសារ​ជំងឺ​ ​ឬ​គ្រោះថ្នាក់​ ​និងមាន​​ការ​ចរ​ចារ​រវាង​អតីត​មេដឹកនាំ​គណបក្ស​ប្រឆាំង​ ​លោក​ ​សម​ ​រង្ស៊ី​ ​និង​ ​លោក​ ​ស​ ​ខេង​ ​ជាដើម​។​
​
​លោក​ ​ណា​រិន​ ​បាន​និយាយ​ថា​ ​”​គាត់​បាន​ផ្សព្វផ្សាយ​ព័ត៌មាន​មិន​ពិត​ ពី​ទំនាស់​រវាង​មេដឹកនាំ​ប្រទេស​របស់​យើង​នៅ​លើ​គណនី​ ​YouTube​ ​របស់​គាត់​គោលបំណងស្វែងរក​អ្នកទស្សនា​ ​និង​ចែករំលែក​ពី​មួយ​ទៅ​មួយ​ ​ដើម្បី​ទទួល​បាន​ប្រាក់ចំណូល​បន្ថែម​ពី​ក្រុមហ៊ុន​ ​Google​ ​។​ ​ព័ត៌មាន​មិន​ពិត​ដែល​លោក​បាន​ចាក់​ផ្សាយ​ ​បាន​បង្ក​ឱ្យ​មាន​ចលាចល​ ​អស្ថិរភាព​ ​និង​អសន្តិសុខ​ក្នុង​ប្រទេស​។​
​
​លោក​ ​ណា​រិន​ ​បាន​កត់សម្គាល់​ថា ​បន្ទាប់ពី​ទទួល​បាន​ពាក្យ​បណ្តឹង​ជាច្រើន​ពី​អ្នកទស្សនា​ ​ប៉ូលី​សនៃ​នាយកដ្ឋាន​ប្រឆាំង​នឹង​ឧក្រិដ្ឋ​កម្ម​តាម​ប្រព័ន្ធ​អ៊ីនធឺណិត​របស់ក្រ​សួង​មហាផ្ទៃ​ បាន​ធ្វើការ​ស៊ើបអង្កេត​រក​ឃើញអ្នក​នៅ​ពីក្រោយ​ព័ត៌មាន​មិន​ពិត​នេះ​។​
​
​គាត់​បាន​និយាយ​ថា ​ប៉ូលី​សបាន​តាមដាន​ ​លោក​ ​គឹ​មលន់​ ​ហើយ​បាន​ចាប់ខ្លួន​គាត់​កាលពី​ថ្ងៃ​ព្រហស្បតិ៍​នៅ​ក្រុង​សិរីសោភ័ណ​ ​ខេត្ត​បន្ទាយមានជ័យ​ ​រួច​បញ្ជូន​ទៅ​រាជធានី​ភ្នំពេញ​ដើម្បី​សាកសួរ​។​
​
​លោក​បាន​បន្ថែម​ថា​ក្នុងអំឡុងពេល​សួរចម្លើយ​ ​លោក​ ​គី​មលន់​ ​បាន​សារភាព​ថា​ពិតជា​បាន​ប្រព្រឹត្ត​បទល្មើស​នេះ​មែន​ ​ដោយ​និយាយ​ថា​លោក​បាន​ក្លែងបន្លំ​ព័ត៌មាន​អំពី​មេដឹកនាំ​របស់​ប្រទេស​នេះ​ ​ពីព្រោះ​លោក​ចង់​ទាក់ទាញ​អ្នកទស្សនា​ច្រើន​ពី​ ​YouTube​ ​ដើម្បី​ទទួល​បាន​ប្រាក់ចំណេញ​ពី​ក្រុមហ៊ុន​ ​Google​ ​Inc​.​៕​