កម្ពុជា និងឡាវ ផ្លាស់ប្ដូរបទពិសោធ និងពង្រឹងពង្រីកកិច្ចសហប្រតិបត្តិការប្រយុទ្ធប្រឆាំងអំពើពុករលួយឆ្លងដែន ក្នុងនាមជាប្រទេសជាប់ព្រំដែន ដើម្បីលើកកម្ពស់ស្ថាប័នអង្គភាពអំពើពុករលួយទ្វេភាគី និងពង្រីកកិច្ចសហប្រតិបត្តិការថ្មីៗរួមគ្នាបន្ថែមទៀតសម្រាប់ផលប្រយោជន៍ប្រទេស និងប្រជាជន។
ការពង្រីកកិច្ចសហប្រតិបត្តិការប្រយុទ្ធប្រឆាំងអំពើពុករលួយទ្វេភាគីខាងលើនេះ ធ្វើឡើងក្នុងជំនួបពិភាក្សាការងាររវាងលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ និងលោក សុនសាយ សីផាន់ដន នាយករដ្ឋមន្ត្រីឡាវ និងមន្ត្រីអាជ្ញាធរអធិការកិច្ចរដ្ឋឡាវ នៅទីក្រុងវៀងច័ន្ទន៍ ប្រទេសឡាវ កាលពីថ្ងៃអង្គារ។
កាលពីថ្ងៃអង្គារ អង្គភាពប្រឆាំងអំពើពុករលួយកម្ពុជា ប្រកាសព័ត៌មានថា ភាគីកម្ពុជា និងឡាវ បានសម្ដែងការរីករាយ និងសាទរនៃកិច្ចសហប្រតិបត្តិការរវាងស្ថាប័នទាំងពីរក្នុងពេលកន្លងមក ជាពិសេសបានពិភាក្សា និងផ្លាស់ប្ដូរគ្នាទៅវិញទៅមកពីស្ថានភាពទូទៅពាក់ព័ន្ធសេដ្ឋកិច្ច និងនយោបាយក្នុងប្រទេសទាំងពីរ។
លោក សុនសាយ សីផាន់ដន បានផ្តាំផ្ញើសួរសុខទុក្ខលោក ហ៊ុន ម៉ាណែត នាយករដ្ឋមន្ត្រីកម្ពុជា និងបានចូលរួមអបអរសាទរចំពោះលទ្ធផលការងាររបស់រដ្ឋាភិបាលកម្ពុជា ដែលទទួលបានជោគជ័យក្នុងរយៈពេលមួយឆ្នាំ និងបានចេញដំណើរបំពេញការងារប្រកបដោយស្វាហាប់ និងឈ្លាសវៃ។
ភាគីទាំងពីរបានពិភាក្សាស៊ីជម្រៅ ចែករំលែក និងផ្លាស់ប្ដូរបទពិសោធរវាងស្ថាប័នទាំងពីរលើការងារប្រយុទ្ធប្រឆាំងអំពើពុករលួយក្នុងប្រទេស អំពើពុករលួយឆ្លងដែន និងការប្រយុទ្ធប្រឆាំងអំពើពុករលួយនៅក្នុងតំបន់ និងពិភពលោក ជាពិសេសប្ដេជ្ញាពង្រឹង និងពង្រីកកិច្ចសហប្រតិបត្តិការបន្ថែមរវាងប្រទេស ដើម្បីប្រយុទ្ធប្រឆាំងអំពើពុករលួយ ក្នុងនាមជាបងប្អូន និងជាអ្នកជិតខាងល្អ។
លោក ឱម យ៉ិនទៀង និងលោក សុនសាយ សីផាន់ដន ក៏បានវាយតម្លៃខ្ពស់ចំពោះកិច្ចសហប្រតិបត្តិការប្រយុទ្ធប្រឆាំងអំពើពុករលួយរវាងអាជ្ញាធរអធិការកិច្ចរដ្ឋឡាវ និងអង្គភាពប្រឆាំងអំពើពុករលួយកម្ពុជា ទាំងអតីតកាល និងបច្ចុប្បន្ន។
អង្គភាពប្រឆាំងអំពើពុករលួយកម្ពុជា បញ្ជាក់ថា កម្ពុជា-ឡាវ បានផ្តល់ការគាំទ្រ និងលើកទឹកចិត្តដល់ស្ថាប័នទាំងពីរបន្ត និងពង្រីកកិច្ចសហប្រតិបត្តិការលើវិស័យពាក់ព័ន្ធបន្ថែមទៀត ដើម្បីផលប្រយោជន៍រួមរវាងប្រទេស និងប្រជាជន។
លោក គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានឱ្យដឹងថា បច្ចុប្បន្នកម្ពុជា និងឡាវ ជាប្រទេសកំពុងអភិវឌ្ឍដូចគ្នា ហើយភាគីទាំងពីរតែងទាមទារពង្រឹងការប្រយុទ្ធប្រឆាំងអំពើពុករលួយ ដើម្បីជំរុញការអភិវឌ្ឍប្រទេស ព្រោះអំពើពុករលួយធ្វើឱ្យរាំងស្ទះដល់ដំណើរការកសាងប្រទេសជាតិ។
លោកថា ចំពោះកិច្ចសហប្រតិបត្តិការរវាងកម្ពុជា-ឡាវ ពាក់ព័ន្ធនឹងវិស័យប្រយុទ្ធប្រឆាំងអំពើពុករលួយ គឺជាការបង្ហាញពីចំណងមិត្តភាព និងបង្កើនកិច្ចសហប្រតិបត្តិការគ្រប់ជ្រុងជ្រោយកាន់តែល្អក្នុងនាមជាប្រទេសជិតខាង។
លោកបន្តថា បច្ចុប្បន្នកម្ពុជាតែងមានទំនាក់ទំនងល្អជាមួយភាគីប្រទេសជិតខាងទាំងវិស័យប្រយុទ្ធប្រឆាំងអំពើពុករលួយ នយោបាយ វប្បធម៌ ការពារជាតិ សុខភាព និងប្រវត្តិសាស្ត្រ ដូច្នេះក្នុងនាមជាអ្នកជិតខាងបើមានទំនាក់ទំនងល្អ និងមានភាពស្មោះត្រង់ គឺមានប្រយោជន៍ច្រើនគ្រប់វិស័យ ជាពិសេសអាចរួមរស់ជាមួយគ្នាប្រកបដោយសន្តិភាព និងភាពរីករាយរវាងប្រជាជននិងប្រជាជន។
ក្នុងកិច្ចប្រជុំអង្គភាពប្រឆាំងអំពើពុករលួយប្រចាំឆ្នាំលើកទី៣ រវាងអង្គភាពប្រឆាំងអំពើពុករលួយកម្ពុជា (ACU) អាជ្ញាធរអធិការកិច្ចរដ្ឋឡាវ (SIA) និងគណៈកម្មការប្រឆាំងអំពើពុករលួយថៃ (NACC) នៅខេត្តសៀមរាប កាលពីសីហា លោក ឱម យ៉ិនទៀង បញ្ជាក់ថា ការប្រយុទ្ធប្រឆាំងអំពើពុករលួយមិនមែនគ្រាន់តែអនុម័តបទប្បញ្ញត្តិ និងអនុវត្តប៉ុណ្ណោះទេ តែទាមទារពេលវេលា និងការប្រឹងប្រែងរួមគ្នាក្នុងការលើកកម្ពស់ការអប់រំ និងទប់ស្កាត់ ដើម្បីកាត់បន្ថយ និងចុងក្រោយធានាគ្មានអំពើពុករលួយ។
លោកបន្ថែមថា រដ្ឋាភិបាលកម្ពុជាដឹកនាំដោយលោក ហ៊ុន ម៉ាណែត នាយករដ្ឋមន្ត្រីបានប្រកាន់ខ្ជាប់នូវគោលនយោបាយយុទ្ធសាស្ត្របញ្ចកោណដំណាក់កាលទី១ ឆ្នាំ២០២៣-២០២៨ ដែលមានការងារប្រឆាំងអំពើពុករលួយជាស្នូលដ៏សំខាន់ និងជំរុញឱ្យបន្តធ្វើកំណែទម្រង់ ព្រមទាំងពង្រឹងអភិបាលកិច្ចល្អ ជាពិសេសលើកកម្ពស់ការគ្រប់គ្រងរដ្ឋបាលស្អាតស្អំ៕
Related Posts
January 19, 2024- February 24, 2024
- June 8, 2024
- September 6, 2023
