សាលាភូមិន្ទរដ្ឋបាលនៅក្រោមក្រសួងមុខងារសាធារណៈនិងសាកលវិទ្យាល័យកាពារជាតិនៅក្រោមក្រសួងការពារជាតិបានចុះអនុស្សរណៈការយោគយល់គ្នាពីម្សិលមិញ ដើម្បីពង្រឹងនិងពង្រីកកិច្ចសហប្រតិបត្តិការរបស់គ្រឹះស្ថានសិក្សាទាំងពីរលើវិស័យអប់រំ បណ្ដុះបណ្ដាល និងគម្រោងកម្មវិធីផ្សេងៗលើគោលការណ៍ពិគ្រោះយោបល់ឯកភាព សមភាព យុត្តិធម៌ និងផ្តល់អត្ថប្រយោជន៍ដល់គូភាគីទៅវិញទៅមក។
អនុស្សរណៈការយោគយល់គ្នាត្រូវបានចុះហត្ថលេខាដោយលោក សុខ សេងយ៉ន នាយករងសាលាភូមិន្ទរដ្ឋបាល និងឧត្តមសេនីយឯក ដោក សុផា សាកលវិទ្យាធិការសាកលវិទ្យាល័យការពារជាតិនៅចំពោះមុខលោក យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈនិងជានាយកសាលាភូមិន្ទរដ្ឋបាល និងនាយឧត្តមសេនីយ៍ ចាយ សាំងយុន រដ្ឋលេខាធិការប្រចាំការក្រសួងការពារជាតិ។
ពិធីចុះហត្ថលេខាលើអនុស្សរណៈយោគយល់គ្នារវាងគ្រឹះស្ថានសិក្សាទាំងពីរនេះ មានការចូលរួមពីមន្ត្រី ពលទាហាន នាយទាហានរង នាយទាហាន និងយោធាចារ្យមកពីសាកលវិទ្យាល័យការពារជាតិ និងថ្នាក់ដឹកនាំរបស់សាលាភូមិន្ទរដ្ឋបាលរបស់ក្រសួងមុខងារសាធារណៈជាច្រើននាក់ផងដែរ។
ឧត្តមសេនីយ៍ឯក ដោក សុផា បានថ្លែងថា ការចុះអនុស្សរណៈយោគយល់គ្នានេះ គឺផ្តោតសំខាន់លើការបង្កើតកិច្ចសហប្រតិបត្តិការនិងការលើកកម្ពស់ការគាំទ្រគ្នាទៅវិញទៅមកពាក់ព័ន្ធនឹងការអភិវឌ្ឍសមត្ថភាពយោធិនកងយោធពលខេមរភូមិន្ទលើការអប់រំការបណ្តុះបណ្តាល ការស្រាវជ្រាវ និងគម្រោងកម្មវិធីផ្សេងៗ ដោយផ្អែកលើគោលការណ៍ពិគ្រោះយោបល់ឯកភាព សមភាព យុត្តិធម៌ និងផ្តល់ផលប្រយោជន៍ជូនគ្នាទៅវិញទៅមក ដើម្បីចូលរួមជាមួយរាជរដ្ឋាភិបាលក្នុងការបណ្តុះបណ្តាលធនធានមនុស្សក្នុងវិស័យការពារជាតិ។
លោកបន្ថែមថា វាក៏ជាការរួមចំណែកថែរក្សាសន្តិភាព ស្ថិរភាព និងការអភិវឌ្ឍប្រទេសជាតិមាតុភូមិដែលសាលាភូមិន្ទរដ្ឋបាលកំពុងបំពេញបេសកម្មរបស់ខ្លួនដោយបានដើរតួនាទីយ៉ាងសំខាន់ ដើម្បីលើកកម្ពស់សមត្ថភាពនិងប្រសិទ្ធិភាពការបណ្តុះបណ្តាល។
លោក យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈបានថ្លែងថា អនុស្សរណៈយោគយល់គ្នានេះបានឆ្លុះបញ្ចាំងអំពីសាកលវិទ្យាល័យការពារជាតិក្លាយជាដៃគូរយុទ្ធសាស្ត្រដ៏សំខាន់មួយទៀតរបស់សាលាភូមិន្ទរដ្ឋបាល ដើម្បីចូលរួមរៀបចំឥរិយាបថរបស់ពលទាហានឱ្យបានសមជាមន្ត្រីបម្រើជាតិ និងប្រជាជនដែលអាចឆ្លើយតបទាន់ពេលវេលាទៅនឹងតម្រូវការពិតប្រាកដរបស់ក្រសួង ព្រមទាំងស្របតាមគោលនយោបាយនិងកម្មវិធីកែទម្រង់ទាំងឡាយរបស់រដ្ឋាភិបាល។
លោកថា ស្មារតីកំណែទម្រង់របស់រដ្ឋាភិបាលបានគូសបញ្ជាក់ក្នុងយុទ្ធសាស្ត្របញ្ចកោណដំណាក់កាលទី១ និងបានដាក់ចេញចក្ខុវិស័យច្បាស់លាស់ គឺការបន្តកែទម្រង់ស្ថាប័ននិងអភិបាលកិច្ចឱ្យសម្រេចបាននូវរដ្ឋបាលសាធារណៈមួយដែលមានសមត្ថភាពខ្ពស់ ខ្លាំង វៃឆ្លាត និងស្អាតស្អំ ហើយបំពេញការងារក្នុងជវភាពនៃប្រព័ន្ធតួអង្គតែមួយ៕
Related Posts
February 3, 2024- February 3, 2024
- September 5, 2023
February 3, 2024
